പാട്ടുനിർത്തി മടങ്ങിയ പാതിരക്കുയിൽ പോലെ വാണി ജയറാം

ആരെയും മയക്കുന്ന ആലാപനം, മാന്ത്രികതയുളള ശബ്ദം, ഉച്ചാരണ സ്ഫുടത ഇതൊക്കെ ഒരു ഗായിക എന്ന നിലയിൽ വാണിയമ്മയുടെ പ്രേത്യകതകളാണ്

എസ്. ജാനകിയും, പി. സുശീലയും പോലെ മലയാള സിനിമ സംഗീത ലോകത്ത് സ്വന്തമായ അടയാളപ്പെടുത്തലുകൾ നടത്തിയ മറുനാടൻ മലയാളി ഗായികയാണ് വാണി ജയറാം. ത്രിവേണി സംഗമം പോലെ മലയാളത്തിലേക്ക് ഒഴുകിയെത്തിയ ആ ഗാനകല്ലോലിനികളിൽ വാണിയമ്മയെ മരണം കവർന്നെടുത്തിരിക്കുന്നു. എങ്കിലും അവർ മലയാളത്തിന് നൽകിയ ഗാനങ്ങൾ ഇപ്പോഴും നിത്യ ചാരുതയോടെ കേരളീയ ഹൃദയത്തിൽ അലയടിക്കുന്നുണ്ട്. തമിഴ്, മലയാളം, തെലുങ്ക്, കന്നഡ മറാത്തി, ഹിന്ദി തുടങ്ങിയ പത്തൊൻപത് ഭാഷകളിലായി പതിനായിരത്തിലധികം ഗാനങ്ങൾ വാണിയമ്മ പാടിയിട്ടുണ്ട്. ആയിരക്കണക്കിന് ഭക്തി ഗാനങ്ങളും പാടിയിട്ടുണ്ട്. 1971-ൽ പുറത്തിറങ്ങിയ ഗുഡ്ഡി എന്ന ചിത്രത്തിൽ വസന്ത് ദേശായിയുടെ സംഗീതത്തിലാണ് അവർ ആദ്യ ഗാനം ആലപിക്കുന്നത്.