പൊളിറ്റിക്കൽ കറക്ട്നസ്സും ആവിഷ്ക്കാര സ്വാതന്ത്ര്യവും

സ്വാർത്ഥബുദ്ധരായ പരമ്പരാഗത സിനിമാപ്രമികൾ പറയുന്നതുപോലെ സിനിമയെ സിനിമയായി കണ്ടാൽ ഒരുപക്ഷേ പ്രശ്നങ്ങൾ തീരുമായിരിക്കും എന്ന് അനുമാനിക്കാനേ തൽക്കാലം തരമുള്ളൂ

- അനീഷ് മോഹനചന്ദ്രൻ

മേലിൽ ഒരാണിന്റെയും നേരെ ഉയരില്ല നിന്റെ ഈ കയ്യ്.. അതെനിക്ക് ചെയ്യാൻ അറിയാഞ്ഞിട്ടല്ല, പക്ഷേ നീ ഒരു പെണ്ണായിപ്പോയി...വെറും പെണ്ണ്... സൂപ്പർ ഹിറ്റ് ചിത്രത്തിലെ മാസ് ഡയലോഗ് കേട്ട് തീയേറ്ററിൽ ആർപ്പുവിളിയും ആഘോഷവും ഉയർന്നു. തുടർന്നുള്ള നാളുകളിൽ പ്രസ്തുത ചിത്രം ഹിറ്റിൽ നിന്നും സൂപ്പർ ഹിറ്റിലേക്കും അവിടെനിന്ന് മെഗാഹിറ്റ് ലിസ്റ്റിലേക്കും കുതിച്ചുയർന്നു. അടിമുടി സ്ത്രീവിരുദ്ധമായ ഡയലോഗ് കേട്ട് സ്ത്രീ പ്രേക്ഷകർ പോലും അന്ന് കയ്യടിച്ചിരുന്നു എന്നതാണ് സത്യം. ഇപ്പറഞ്ഞത് 1995 ലെ കഥ. ഇന്ന് കഥ മാറി. സ്ത്രീവിരുദ്ധം പോയിട്ട് സ്ത്രീപക്ഷമല്ലാത്ത ഒരു ചലനം പോലും തീയേറ്ററിൽ ഉയർന്നാൽ അത് ചോദ്യം ചെയ്യപ്പെടും. അതിനിപ്പോൾ മുഖ്യധാരാ മാധ്യമങ്ങളുടെ സഹായം പോലും ആവശ്യമില്ല. സൈബർ ഇടം തന്നെ ധാരാളം.