കുടുംബസ്നേഹം നിറഞ്ഞ സ്വർഗം

ഈ ചിത്രത്തിന്റെ കഥ നടക്കുന്നത് ഈ വീടുകൾ കേന്ദ്രീകരിച്ചാണ്

- വാഴൂർ ജോസ്

പാലാക്ക് അടുത്ത് കുറുമണ്ണ് എന്ന ഗ്രാമപ്രദേശത്തെ പുതുമ വിട്ടൊഴിയാത്ത ഒരു പോഷ് വീട്. അതിനടുത്ത് ഏകദേശം അമ്പതുമീറ്റർ അകലെയായി അത്രയും പോഷ് അല്ലാത്ത എന്നാൽ പ്രൗഢി ഒട്ടും കുറയാത്ത മറ്റൊരു വീട്. ഇത് രണ്ടും റെജീസ് ആന്റണി സംവിധാനം ചെയ്യുന്ന സ്വർഗ്ഗം എന്ന ചിത്രത്തിന്റെ പ്രധാന ലൊക്കേഷനാണ്. ഈ ചിത്രത്തിന്റെ കഥ നടക്കുന്നത് ഈ വീടുകൾ കേന്ദ്രീകരിച്ചാണ്. അയൽവാസികളായ രണ്ട് കുടുംബങ്ങളുടെ കഥ. അതിനനുയോജ്യമായ വീടുകളാണ് ഇവിടെ ലഭിച്ചിരിക്കുന്നത്. ഈരാറ്റുപേട്ട, പാലാ, ഭരണങ്ങാനം, പൂഞ്ഞാർ ഭാഗങ്ങളിലായാണ് ഈ ചിത്രത്തിന്റെ ചിത്രീകരണം പുരോഗമിക്കുന്നത്.

എൻ.ആർ.ഐക്കാരനായ വക്കച്ചനും കുടുംബവുമാണ് വലിയ വീട്ടിലെ താമസക്കാരൻ. അടുത്ത വീട്ടിലെ താമസക്കാരൻ പലചരക്കുകച്ചവടക്കാരനായ ജോസുകുട്ടിയുടെ കുടുംബമാണ്. വക്കച്ചന്റെ ഭാര്യ ആനിയമ്മ, ജോസുകുട്ടിയുടെ ഭാര്യ സിസിലി. പിന്നെ അവരുടെ മക്കൾ. വക്കച്ചനെ സംബന്ധിച്ചിടത്തോളം സമ്പത്ത് ഏറെയുണ്ട്. ഈ ഏറ്റക്കുറച്ചിലുകൾ ഈ ചിത്രത്തിന്റെ കഥാപുരോഗതിയിൽ പ്രധാന ഘടകം തന്നെയാണ്.