എളിമകൊണ്ട് ലോകം കീഴടക്കാം

 എത്രമാത്രം ഉന്നതനാണെങ്കിലും ആ ബോധ്യം ഉള്ളപ്പോൾ തന്നെ മറ്റുള്ളവരിലൊരാളായി അവരോട് പെരുമാറാൻ ഒരു വ്യക്തിയിലുള്ള നന്മയാണ് എളിമ

- ഡോ.സെബിൻഎസ്.കൊട്ടാരം കൺസൾട്ടന്റ്സൈക്കോളജിസ്റ്റ് മോട്ടിവേഷണൽട്രെയ്നർ drsebinskottaram.blogspot.com

നെന്മണികൾ വിളഞ്ഞുനിൽക്കുന്ന പാടത്തുകൂടി നടക്കുമ്പോൾ ഒരു കാഴ്ച കാണാം. നിറയെ നെന്മണികളുള്ള നെൽച്ചെടികൾ കുനിഞ്ഞു നിൽക്കുന്നു. അതേസമയം ഉള്ളിലൊന്നുമില്ലാത്ത പതിരുകളാവട്ടെ തലയുയർത്തി. ഞാൻ എല്ലാവരെയുംകാൾ മുകളിലാണെന്ന ഭാവത്തിൽ നിൽക്കുന്നത് കാണാം. അവയുടെ ഉള്ള് ശൂന്യമാണ്.

ജീവിതത്തിലും ഇതു പോലെയാണ്. ശരിയായ വഴിയിലൂടെ ജീവിതത്തിൽ അംഗീകാരങ്ങളും നേട്ടങ്ങ ളും ഉയർച്ചയും നേടിയവർ എപ്പോഴും മറ്റുള്ളവരോട് എളിമയോടെയായിരിക്കും പെരുമാറുക. തങ്ങളുടെ നേട്ടങ്ങളോ ഉയർച്ചയോ പദവിയോ ഒന്നും ഏതുജോലിചെയ്യാനും എത്ര താഴ്ന്നുപെരുമാറാനും തെറ്റുപറ്റിയാൽ അതേറ്റുപറയാനും അവർക്കു തടസ്സമാവുകയില്ല. അതുകൊണ്ടാണ് എളിമയെ ദൈവികപുണ്യമെന്ന് വിളിക്കുന്നത്. എളിമയുള്ളവരുടെ സാമൂഹിക കുടുംബ ബന്ധങ്ങൾ ശക്തമായിരിക്കും. മറ്റുള്ളവരെ അംഗീകരിക്കാനും പരിഗണിക്കാനും മനസ്സിലാക്കാനും എളിമയു ള്ളവർക്ക് എളുപ്പത്തിൽ സാധിക്കുന്നു. അതിനാൽ എളിമയുള്ളവരിലേക്ക് മറ്റുള്ളവർ എളുപ്പത്തിൽ ആകർഷിക്കപ്പെടുകയും അവരെ ആദരിക്കുകയും ചെയ്യുന്നു. എത്ര ഉന്നതനാണെങ്കിലും മറ്റുള്ളവരെക്കാൾ വ്യത്യാസം ഭാവിക്കാതെ അവരിലൊരാളായി പെരുമാറുന്നത് എളിമയുള്ളവരുടെ പ്രത്യേകതയാണ്. അതിനാൽത്തന്നെ അവരോട് തുറന്നിടപെടാൻ മറ്റുള്ളവരും മടികാണിക്കുകയില്ല.