തടസ്സം നീക്കാൻ ആൻജിയോപ്ലാസ്റ്റി

ഹൃദയ ധമനിയിൽ കൊഴുപ്പും മറ്റും അടിഞ്ഞുകൂടി തടസ്സമുണ്ടാകുമ്പോൾ അവ നീക്കി രക്തക്കുഴൽ വികസിപ്പിച്ച് രക്തപ്രവാഹം സുഗമമാക്കുന്ന ചികിത്സാരീതിയാണ് കൊറോണറി ആൻജിയോപ്ലാസ്റ്റി

- ഡോ.ആഷിഷ്കുമാർ എം.ചെയർമാൻ കാർഡിയോളജിവിഭാഗം സെന്റർഫാർഹാർട്ട് വാസ്കുലാർകെയർ ഹോസ്പിറ്റൽ കോഴിക്കോട്

ഹൃദയത്തിലേക്കുള്ള രക്തക്കുഴലുകളിൽ കൊഴുപ്പടിഞ്ഞോ മറ്റെന്തെങ്കിലും കാരണങ്ങൾ മൂലമോ ചിലപ്പോൾ തടസ്സങ്ങൾ ഉണ്ടാകാം. ഇത്തരം തടസ്സങ്ങൾ ഉണ്ടായാൽ ആവശ്യത്തിന് രക്തം ലഭിക്കാതെ ഹൃദയത്തിന്റെ പ്രവർത്തനം പ്രതിസന്ധിയിലാകും. ഇത്തരത്തിൽ രക്തധമനികളിലുണ്ടായ ബ്ലോക്കുകൾ നീക്കുന്ന ചികിത്സാരീതിയാണ് ആൻജിയോപ്ലാസ്റ്റി. ആൻജിയോ എന്നാൽ രക്തക്കുഴലുകൾ എന്നും പ്ലാസ്റ്റി എന്നാൽ റിപ്പയർ എന്നുമാണ് അർഥം. അതുകൊണ്ട് രക്തക്കുഴലുകളെ റിപ്പയർ ചെയ്യുന്ന ചികിത്സാരീതിയെ ആൻജിയോപ്ലാസ്റ്റി എന്ന് പറയുന്നു.

കൊറോണറി ധമനികൾ വഴിയാണ് ഹൃദയത്തിലേക്ക് ശുദ്ധ രക്തം എത്തുന്നത്. ഈ ധമനികളിൽ ബ്ലോക്കുണ്ടാകുന്നതിനെത്തുടർന്ന് അത് നീക്കുന്നതിന് വേണ്ടി ചെയ്യുന്ന ആൻജിയോപ്ലാസ്റ്റിയാണ് കൊറോണറി ആൻജിയോപ്ലാസ്റ്റി. ഹൃദയത്തിലെ രക്തക്കുഴലുകളിലെ തടസ്സം മാറ്റാൻ മാത്രമല്ല, ശരീരത്തിന്റെ മറ്റ് ഭാഗങ്ങളിലെ രക്തക്കുഴലുകളിലെ തടസ്സം മാറ്റാനും ആൻജിയോപ്ലാസ്റ്റി ചെയ്യാറുണ്ട്. അതിനെ പെരിഫെറൽ ആൻജിയോപ്ലാസ്റ്റി എന്നും, മസ്തിഷ്കത്തിലേക്ക് പോകുന്ന രക്തക്കുഴലിലാണ് ചെയ്യുന്നതെങ്കിൽ അതിനെ കരോട്ടിഡ് ആൻജിയോപ്ലാസ്റ്റി എന്നും പറയുന്നു.

രക്തക്കുഴലുകൾ അടയുമ്പോൾ

 രക്തക്കുഴലിൽ ബ്ലോക്ക് വരുന്നത് അതിറോസ്റ്റിറോസിസ് എന്ന അവസ്ഥ മൂലമാണ്. കൊഴുപ്പ് കൂടുന്നത് മാത്രമല്ല ഇതിന് കാരണം. ചില തരം കൊഴുപ്പുകൾ രക്തക്കുഴലുകളിൽ അടിയുന്നതിനൊപ്പം പലതരത്തിലുള്ള കോശങ്ങളും അവിടെ അടിഞ്ഞുകൂടും. ഇവയെല്ലാം ചേർന്നാണ് (പ്ലാക്ക് ബ്ലോക്കുണ്ടാകുന്നത്. രക്തക്കുഴലിലെ ഇത്തരം മാറ്റങ്ങൾ ചെറുപ്പത്തിൽ തന്നെ തുടങ്ങാറുണ്ട്. പക്ഷേ ദീർഘകാലത്തിന് ശേഷമായിരിക്കും ഇവയെല്ലാം തിരിച്ചറിയുക. 

മറ്റൊരു കാരണം ജീവിതശൈലീരോഗങ്ങളാണ്. പ്രമേഹം, അമിത ബി.പി., കൊളസ്ട്രോൾ വ്യതിയാനങ്ങൾ തുടങ്ങിയവ ബ്ലോക്കിന് ഇടയാക്കാം. വ്യായാമക്കുറവ്, ഇമോഷണൽ സ്ട്രെസ്സ്, പുകവലി, ജനിതകപരമായ കാരണങ്ങൾ എന്നിവയും ബ്ലോക്കിന് സാധ്യത കൂട്ടുന്ന ഘടകങ്ങളാണ്. എന്നാൽ, ഇവയില്ലാത്തവർക്ക് ഈ രോഗം വരില്ല എന്നില്ല. 

ആൻജിയോപ്ലാസ്റ്റി എപ്പോൾ