പമ്പ് വാങ്ങാൻ പഠിക്കണം

വീടിന്റെ ഉയരവും കിണറിന്റെ ആഴവും അനുസരിച്ച് അനുയോജ്യമായ വാട്ടർ പമ്പ് വാങ്ങാം

ഒരു തുണ്ടു ഭൂമിയും കിണറുമുള്ള ആർ വെള്ളം പമ്പ് ചെയ്യാൻ വാട്ടർ പമ്പ് വാങ്ങേണ്ടിവരും. ഏത് തരം വേണം, എത്ര ഹോഴ്സ് പവർ (hp) വേണം എന്ന തെല്ലാം കൃത്യമായി അറിയാമെങ്കിലേ പമ്പിന് ഈടുണ്ടാകൂ. വൈദ്യുതി പാഴാകാതിരിക്കാനും ഈ അറിവുകൾ അത്യാവശ്യം. വാട്ടർ പമ്പ് വാങ്ങുമ്പോൾ ശ്രദ്ധിക്കേണ്ട കാര്യങ്ങൾ അറിയാം.

വേണം ചില അറിവുകൾ

പൂർണമായി പ്ലമറെ ഏൽപ്പിക്കേണ്ട കാര്യമല്ല വാട്ടർ പമ്പ് വാങ്ങൽ. ഓരോ വീട്ടിലേക്കും വേണ്ട വാട്ടർ പമ്പ് വ്യത്യസ്തമായിരിക്കും. വീട്ടു കാർക്ക് ആ വിഷയത്തിൽ അടിസ്ഥാനപരമായ അറിവെങ്കിലും ഉണ്ടായിരിക്കണം. തെറ്റായ പമ്പ് വാങ്ങിയാൽ പെട്ടെന്നുതന്നെ കേടായിപ്പോകുന്നതുമാത്രമല്ല നഷ്ടം. അനുയോജ്യമല്ലാത്ത വാട്ടർ പമ്പ് ഉപയോഗിക്കുന്നത് മൂലം വൈദ്യുത ചാർജ് കൂടുതൽ വരികയും ചെയ്യും.

ടോട്ടൽ ഹെഡ്, ഡിസ്ചാർജ് എന്നീ രണ്ട് കാര്യങ്ങൾക്ക് അനുസരിച്ചായിരിക്കണം വാട്ടർ പമ്പ് തിരഞ്ഞെടുക്കേണ്ടത്.

എത്ര സമയത്തിനുള്ളിൽ ടാങ്ക് നിറയണം എന്നതിനെക്കുറിച്ചുള്ള ഏകദേശ കണക്കാണ് ഡിസ്ചാർജ് കൊണ്ട് ഉദ്ദേശിക്കുന്നത്. ഉദാഹരണമായി 2000 ലീറ്റർ സംഭരണശേഷിയുള്ള ടാങ്ക് 10 മിനിറ്റിനുള്ളിൽ നിറയണമെങ്കിൽ പമ്പ് മിനിറ്റിൽ 200 ലീറ്റർ വെള്ളം ഒഴുക്കണം. അങ്ങനെ വെള്ളം കിട്ടാൻ എത്ര പവർ ഉള്ള മോട്ടർ വേണം എന്ന് ചിന്തിക്കണം. എല്ലാ പ്രമുഖ വാട്ടർ പമ്പ് കമ്പനികൾക്കും പമ്പ് ഡിസ്ചാർജ് ചാർട്ട് ഉണ്ട്. അതു നോക്കി ലീറ്റർ/മിനിറ്റ് അല്ലെങ്കിൽ ലീറ്റർ/അവർ എത്ര വെള്ളം കിട്ടുമെന്ന് മനസ്സിലാക്കാം.