കുടിവെള്ളം കണ്ണുമടച്ച് വിശ്വസിക്കരുത്

ഓരോ വർഷവും വെള്ളത്തിന്റെ പരിശുദ്ധി കുറഞ്ഞു വരുന്നു. അതിനാൽ ജലശുദ്ധീകരണ മാർഗങ്ങൾ അത്യാവശ്യമാണ്

കുടിക്കുന്ന വെള്ളത്തെ പോലും വിശ്വസിക്കാൻ കൊള്ളാത്ത കാലമാണ്. കിണറിലൂടെയും വാട്ടർ അതോറിറ്റി വഴി പൈപ്പിലൂടെയും ലഭിക്കുന്ന വെള്ളത്തിൽ വരെ മാലിന്യങ്ങൾ കലർന്നിട്ടുണ്ടെന്നാണ് പഠനങ്ങൾ സൂചിപ്പിക്കുന്നത്. ഇത് പല ആരോഗ്യ പ്രശ്നങ്ങൾക്കും കാരണമാകുന്നു. ഓരോ വർഷവും വെള്ളത്തിന്റെ പരിശുദ്ധി കുറഞ്ഞു വരുന്നു. 2018 ലെ വെള്ളപ്പൊക്കത്തിനു ശേഷം പല കിണറുകളിലെയും വെള്ളത്തിൽ ഇരുമ്പിന്റെ അംശം കൂടി, വെള്ളത്തിന്റെ കാഠിന്യവും കൂടി. ശുദ്ധമായ വെള്ളം ലഭിക്കാൻ ജല ശുദ്ധീകരണ മാർഗങ്ങൾ പിന്തുടരുകയേ ഉള്ളൂ വഴി.

നഗരങ്ങളിൽ ജല അതോറിറ്റി വഴി ലഭിക്കുന്ന പൈപ്പ് വെള്ളമാണ് കുടിക്കാനും പാചകത്തിനും ഉപയോഗിക്കുന്നത്. കിണർ കുഴൽക്കിണർ വെള്ളം മറ്റാവശ്യങ്ങൾക്കും ഉപയോഗിക്കുന്നു. എന്നാൽ നഗരം വിട്ടാൽ നേരെ തിരിച്ചാണ്. കിണർവെള്ളം കുടിക്കാനും പൈപ്പുവെള്ളം മറ്റാവശ്യങ്ങൾക്കും ഉപയോഗിക്കുന്നു. കാരണം നഗരങ്ങളിൽ സെപ്റ്റിക്ടാങ്ക് കിണറിന് അടുത്താ യിരിക്കും. എന്നാൽ ഉൾപ്രദേശങ്ങളിൽ കിണറും സെപ്റ്റിക് ടാങ്കുമായി 15-25 മീറ്റർ അകലം ഉണ്ടാകും.

പ്യൂരിഫയർ മതിയാകുമോ?

പൈപ്പ് വെള്ളം ശുദ്ധീകരിച്ചാണ് ലഭിക്കുന്നതെങ്കിലും വീടുകളിൽ ഒന്നുകൂടി ശുദ്ധീകരിക്കണം. അടുക്കളയിൽ വാട്ടർ പ്യൂരിഫയർ വച്ചാൽ കുടിവെള്ളവും പാചകത്തിനുള്ള വെള്ളവും ശുദ്ധീകരിച്ചെടുക്കാം. അൾട്രാവയലറ്റ്, അൾട്രാഫിൽറ്ററേഷൻ ഇതുവഴി സാധ്യമാകുന്നു. വെള്ളത്തിലെ ബാക്ടീരിയ, ഇ കോളി, ക്ലോറിൻ തുടങ്ങിയവയുടെ സാന്നിധ്യം ഒഴിവാക്കാം.