അടുക്കള പുതുമകളും പുതുക്കലും

അടുക്കള പുതിയതായി പണിയാനും പുതുക്കാനും ആഗ്രഹിക്കുന്നവർക്ക് പുതുപുത്തൻ ട്രെൻഡുകൾ ഇതാ...

- തയാറാക്കിയത് സുനിത നായർ, ശ്രീദേവി വിവരങ്ങൾക്കു കടപ്പാട് റോസ് തമ്പി, ആർക്കിടെക്ട്, കൊച്ചി നാസിയ ഹാനി, ആർക്കിടെക്ട്, കോഴിക്കോട്

പുതിയ ട്രെൻഡുകൾ പെട്ടെന്നു മാറി മാറി വരുന്ന ഇടമാണ് അടുക്കള. ഒരു വീടിന്റെ മുഴുവൻ ആരോഗ്യവും കാത്തു സൂക്ഷിക്കേണ്ട ചുമതല അടുക്കളായതിനാൽ വൃത്തിയായും ഭംഗിയായും ഒരുക്കേണ്ട ഇടം കൂടിയാണ് ഇത്. ഭംഗിയും ഉപയോഗക്ഷമതയും ഒരുമിച്ചു കൊണ്ടു പോകുകയാണ് വേണ്ടത്. നമ്മുടെ ജീവിത ശൈലിക്കും പാചക രീതിക്കും ഇണങ്ങുന്ന ട്രെൻഡ് സ്വീകരിക്കാം.

ഐലൻഡിനോടു പ്രിയം

ഐലൻഡ് കിച്ചണോടുള്ള പ്രിയം ഇപ്പോൾ കൂടിയിട്ടുണ്ട്. സ്ഥലസൗകര്യമുള്ളവർക്ക് ഐലൻഡ് കിച്ചൺ നൽകാം. അടുപ്പ് ഐലൻഡിൽ നൽകണമെന്നുമില്ല. പാ ചകത്തിനുള്ള ഒരുക്കങ്ങൾക്കുള്ള ഇടമായി ഐലൻഡ് കൗണ്ടർ നൽകുന്നവരുമുണ്ട്. ഒന്നിൽക്കൂടുതൽ ആളു കളുള്ളപ്പോൾ എല്ലാവർക്കും ഒരുമിച്ച് വർത്തമാനമൊക്കെ പറഞ്ഞ് പാചകം ചെയ്യാനുള്ള സൗകര്യം ലഭിക്കുന്നുവെന്നത് ഇതിന്റെ മേന്മയാണ്. പാചകവ്ലോഗ് ചെയ്യുന്നവർക്കും ഐലൻഡ് കിച്ചൺ സൗകര്യപ്രദമാണ്.

നിറങ്ങളുടെ കാര്യത്തിൽ ഇളം നിറം, കടും നിറം എന്നൊന്നില്ല. വീട്ടുകാർക്ക് ഏതാണോ ഇഷ്ടം അതു നൽകുക എന്നതാണ് നയം. കടും നിറമാണെങ്കിലും ഇളം നിറമാണെങ്കിലും അധികം കാണാത്ത പുതിയ നിറക്കൂട്ടുകൾ പരീക്ഷിക്കുന്നതിലാണ് താൽപര്യം. സിമന്റ് ഫിനിഷ്, ഇൻഡസ്ട്രിയൽ സ്റ്റീൽ ഫിനിഷ്, സൂപ്പർ മാറ്റ് ഫിനിഷ് തുടങ്ങിയവയാണ് കാബിനറ്റ് ഫിനിഷുകളിലെ പുതു തരംഗം. അക്രിലിക്കിനു പകരം ഇക്കോഫ്രണ്ട്ലി ആയ പോളിലാക് ഫിനിഷ് അവതരിച്ചിട്ടുണ്ട്. മൈക്ക അക്രിലിക്, ലാഡ്, വെനീർ, പിയു ഫിനിഷ് എന്നിവയാണ് പൊതുവെ കണ്ടു വരുന്ന ഫിനിഷുകൾ. വെനീറിലും മൈക്കയിലും ഒട്ടേറെ വൈവിധ്യങ്ങൾ ലഭ്യമാണ്.

ഇക്കോഫ്രണ്ട്ലി, സ്റ്റീൽ ഷട്ടറുകൾ

കാബിനറ്റ് ഷട്ടറുകളിൽ ഇക്കോ ഫ്രണ്ട്ലി മെറ്റീരിയലുകളോട് താൽപര്യം കൂടിയിട്ടുണ്ട്. ഗ്രീൻ സർട്ടിഫിക്കറ്റ് ഉള്ള എംഡിഎഫ്, എൻജിനീയേഡ് വുഡ് എന്നിവ ട്രെൻഡ് ആണ്. സ്റ്റീൽ കാബിനറ്റിനോടും ആഭിമുഖ്യം കൂടി വരുന്നു. പ്രളയത്തെ അതിജീവിക്കാനുള്ള കഴിവാണ് സ്റ്റീലിന്റെ താരമൂല്യം പെട്ടെന്ന് ഉയർത്തിയത്. പരിപാലിക്കാൻ എളുപ്പമാണ്, ആജീവനാന്തകാലം ഈടു നിൽക്കും, ആവശ്യമെ ങ്കിൽ മറ്റൊരിടത്തേക്ക് മാറ്റി പിടിപ്പിക്കുകയും ചെയ്യാം. സ്റ്റീൽ കാബിനറ്റുകളുടെ ഷട്ടറിൽ ടൈൽ ഒട്ടിക്കുന്നതും പുതുമയാണ്. കാഴ്ചയിൽ സ്റ്റീലാണെന്ന് അറിയുകയേയില്ല. സ്റ്റീൽ വളച്ചെടുത്ത് കാബിനറ്റ് നിർമിക്കുന്നതിനാൽ "സീംലെസ് (അരികുകളില്ലാത്ത) ലുക്ക് ആണ്. അതുകൊണ്ട് അരികുകളിൽ അഴുക്ക് ഇരിക്കില്ല.