ചെലവ് കുറയ്ക്കാനാകുമോ?

വീടിന്റെ ഘടന പൂർത്തിയാകുംവരെ ഓരോ ഘട്ടവും പ്രധാനമാണ്. അശ്രദ്ധയും അറിവില്ലായ്മയുമാണ് ചെലവ് കൂട്ടുന്നത്.

മണ്ണ് പരിശോധിക്കുന്നതെല്ലാം പാഴ്ച്ചെലവല്ലേ? പണ്ടത്തെ വീടുകൾ ഇതെല്ലാം ചെയ്താണോ കാലമിത്രയും നിലനിന്നത്? ഇതെല്ലാം വെറുതെ പണം തട്ടിക്കാനുള്ള മാർഗങ്ങളല്ലേ? ടെക്നോളജിയിലെ പുതുമകളെ സംശയത്തോടെയാണ് പലരും കാണുന്നത്. അത കൊണ്ട് സ്വീകരിക്കാൻ തയാറാകാത്ത പലതും നമ്മെ പാഴ്‌ച്ചെലവിലേക്കും സ്വസ്ഥതയില്ലായ്മയിലേക്കും നയിച്ചേ ക്കാം. ചെറിയ ചില അടിസ്ഥാനകാര്യങ്ങൾ പഠിച്ച് പണിതാൽ, വീടിന്റെ ഉറപ്പ് കൂടുക മാത്രമല്ല, ചെലവ് കുറയുകയും ചെയ്യും. നമുക്കെല്ലാം ഉണ്ടാകാവുന്ന, നിർമാണസംബന്ധമായ ചില സംശയങ്ങളും ഉത്തരങ്ങളുമാണ് ഇനിയുള്ള പേജുകളിൽ.

തറയൊരുക്കും മുൻപ് പ്ലോട്ടിലെ മണ്ണ് പരിശോധിക്കാതിരിന്നാൽ വീടുപണിയുടെ ചെലവ് കൂടുമോ?

പ്ലോട്ടിലെ മണ്ണ് പരിശോധിച്ചാൽ ഒരുപക്ഷേ, വൻ സാമ്പത്തിക നഷ്ടം ഒഴിവാക്കാൻ കഴിയും. വീടുനിർമാണം ഗൗരവപൂർവം കൈകാര്യം ചെയ്യുന്നവർ അടിത്തറ നിർമാണത്തിനു മുൻപ് പ്ലോട്ടിലെ മണ്ണ് പരിശോധിക്കാറുണ്ട്. ഭൂമി ചിലയിടത്ത് പാറയായിരിക്കും, ചിലയിടത്ത് ഇളകിക്കിടക്കുന്ന മണ്ണോ മണലോ ആയിരിക്കും. നികത്തിയ നിലമോ പാടത്തോടു ചേർന്ന ഭൂമിയോ ആകാം. ഏത് മണ്ണിൽ പണിയുന്ന അടിത്തറയ്ക്കും നൽകേണ്ട ബലത്തിന് വ്യത്യാസമുണ്ടായിരിക്കും.

തൊട്ടടുത്ത പ്ലോട്ടിലെപ്പോലെയാകണമെന്നില്ല നമ്മുടെ പ്ലോട്ടിലെ മണ്ണിന്റെ ഘടന. അതുകൊണ്ടുതന്നെ, അടുത്തുള്ളവർ കരിങ്കല്ല് ഉപയോഗിച്ച് സാധാരണ അടിത്തറ നിർമിച്ചു എന്ന കാരണത്താൽ നമ്മുടെ വീടിനും സാധാരണ അടിത്തറ മതി എന്ന ചിന്ത ശരിയാവണമെന്നില്ല. ചിലപ്പോൾ ഇത് കെട്ടിടത്തിന്റെ ബലക്കുറവിനു കാരണമാകാം. ഭാവിയിൽ കെട്ടിടം ഇരുന്നുപോകാൻ സാധ്യതയുണ്ട്.

മണ്ണിന്റെ ഘടനയെക്കുറിച്ച് അറിയാത്തത് ആവശ്യമുള്ളതിലധികം ബലപ്പെടുത്തിയുള്ള അടിത്തറയുടെ നിർമാണത്തിലേക്കു നയിക്കാം. അനാവശ്യമായി തറ ബലപ്പെടുത്തുമ്പോൾ നിർമാണവസ്തുക്കളുടെ അമിതോപയോഗത്തിനും ആവശ്യത്തിലധികമുള്ള അധ്വാനം പാഴാകാനും ഇടയാകും. സ്വാഭാവികമായും ഇത് ചെലവ് കൂട്ടും. മാത്രമല്ല, നിർമിക്കുന്ന കെട്ടിടത്തിലും എടുക്കേണ്ട ലോഡിനും അനുസരിച്ചും അടിത്തറയുടെ സ്വഭാവം മാറും. ഇതും മണ്ണ് പരിശോധനയിലൂടെ മനസ്സിലാക്കാം.

വീട് വലുതായാലും കോളം ബീം സ്ട്രക്ചർ കൊടുത്താൽ ബലത്തിന്റെ കാര്യത്തിൽ പേടിക്കേണ്ട എന്നത് ശരിയാണോ? വീടിന് ബലം കിട്ടാൻ കോളം ബീം സ്ട്രക്ചറിന്റെ ആവശ്യം എല്ലായിടത്തുമില്ല.