പ്രകാശം പരത്തുന്നവൾ

വെളിച്ചം എന്നർഥമുള്ള പേരിനുടമയായ സിയ സഹ്റ കുടുംബത്തിന്റെ വെളിച്ചമാണിന്ന്. പ്രകൃതി ദുരന്ത വേളയിൽ നാടിന് വെളിച്ചമാകാനും അവൾക്കായി

- പ്രിൻസ് കെ. ഹരിദാസ്

2014ലെ ഹജ്ജുൽ അക്ബർ ദിനത്തിലായിരുന്നു അവളുടെ ജനനം. മുസ്ലിംങ്ങൾ ഏറെ പുണ്യമായി കരുതുന്ന, വെള്ളിയാഴ്ചയും അറഫയും ഒരുമിച്ചുവന്ന ഈ അപൂർവ ദിവസത്തിൽ കുഞ്ഞ് പിറന്നതോടെ മാതാപിതാക്കളായ മുഹമ്മദ് നിസാറും ജസീലയും ഏറെ സന്തോഷിച്ചു. ഗൾഫിലായിരുന്ന നിസാർ വിഡിയോ കാളിലൂടെ മകളെ ആദ്യമായി കണ്ടു. പുണ്യദിനത്തിൽ ജനിച്ച കുഞ്ഞ് നിന്റെ ഭാഗ്യമാകുമെന്ന് സഹപ്രവർത്തകർ വിധിയെഴുതി. ഒരു സാധാരണ കുടുംബത്തിലേക്ക് ജനനംകൊണ്ട് വെളിച്ചം പകർന്ന ആ കുഞ്ഞിന് വീട്ടുകാർ പേരിട്ടു -സിയ സഹ്റ പേരിനർഥം വെളിച്ചം.

ഇരുട്ട് പരന്ന നാൾ

ഈ സന്തോഷം അധികനാൾ നീണ്ടുനിന്നില്ല. ഒരു വയസ്സ് കഴിഞ്ഞെങ്കിലും മറ്റു കുഞ്ഞുങ്ങളിൽനിന്ന് ചില വ്യത്യസ്തതകൾ സിയയിൽ കണ്ടു. അവളുടെ കൈകാലുകൾ അത്ര വേഗത്തിൽ ചലിച്ചില്ല, തല മറ്റുള്ള കുട്ടികളുടേതു പോലെ വളർന്നതുമില്ല. വിഡിയോ കാളിലൂടെ സംസാരിക്കുമ്പോൾ കുഞ്ഞിൽ കണ്ട ഈ മാറ്റം പിതാവ് നിസാറിൽ ചില സംശയങ്ങൾ ജനിപ്പിച്ചു. നമ്മുടെ കുഞ്ഞിന് എന്തോ പ്രശ്നമുണ്ടെന്നും ഡോക്ടറെകാണിക്കണമെന്നും നിസാർ ഭാര്യയെയും വീട്ടുകാരെയും ഒരുവിധം പറഞ്ഞു മനസ്സിലാക്കി. ദീർഘനാളത്തെ ആശുപത്രിവാസം മുന്നിൽ കണ്ട് നിസാർ വൈകാതെ സൗദി അറേബ്യയിലെ ജോലി മതിയാക്കി നാട്ടിലേക്ക് പറന്നു.

ആശുപത്രിയിൽനിന്ന് ആശുപത്രിയിലേക്ക്...