‘હર ઘર તિરંગા’ અભિયાન: ગુજરાતના દરેક જિલ્લા, ગામેગામ રાષ્ટ્રભક્તિના રંગે રંગાયા

મુખ્યમંત્રીશ્રી ભૂપેન્દ્રભાઈ પટેલે સુરત ખાતેથી રાજ્યવ્યાપી ‘હર ઘર તિરંગા’ અભિયાનનો શભારંભ કરાવ્યો

દેશની આઝાદીને ૭૫ વર્ષ પૂર્ણ થવાના અવસરે તમામ દેશવાસીઓ ઉત્સાહભેર આઝાદીનો અમૃત મહોત્સવ ઊજ્વી રહ્યા છે ત્યારે વડાપ્રધાનશ્રી નરેન્દ્રભાઈ મોદીએ દેશના તમામ નાગરિકોને પોતાના ઘરે રાષ્ટ્રધ્વજ લહેરાવવાનું આહ્વાન કરીને ‘હર ઘર તિરંગા’ અભિયાનનો શંખનાદ કર્યો હતો, જેને દેશવાસીઓએ પ્રચંડ પ્રતિસાદ આપીને વધાવી લીધો છે. ૧૩થી ૧૫ ઑગસ્ટ વચ્ચે દરેક ઘર, સરકારી અને ખાનગી કચેરીઓ, સંસ્થાનો પર રાષ્ટ્રધ્વજ ફરકાવીને ગુજરાતના દરેક જિલ્લા, ગામેગામ રાષ્ટ્રભક્તિના રંગમાં રંગાઈ ગયા હતા.

વડાપ્રધાનશ્રીના આહ્વાન બાદ દેશભરમાં ‘હર ઘર તિરંગા’ અભિયાનની ગુંજ સંભળાઈ રહી છે અને ઘરે-ઘરે રાષ્ટ્રની ખુશ્બ મહેકવા લાગી છે. ‘હર ઘર તિરંગા' અભિયાનની શરૂઆત કેન્દ્રીય ગૃહમંત્રીશ્રી અમિતભાઈ શાહના સત્તાવાર નિવાસસ્થાનેથી થઈ હતી. શ્રી અમિતભાઈ શાહે તેમના પત્ની સોનલબહેન શાહ સાથે તેમના નિવાસે ભારતનો રાષ્ટ્રધ્વજ લહેરાવીને આઝાદીના અમૃત મહોત્સવ હેઠળ ચાલી રહેલા ‘હર ઘર તિરંગા’ અભિયાનનો વિધિવત્ શુભ આરંભ કરાવ્યો હતો.

મુખ્યમંત્રીશ્રી ભૂપેન્દ્ર પટેલે સુરત ખાતેથી રાજ્યવ્યાપી ‘હર ઘર તિરંગા' અભિયાનનો શુભારંભ કરાવ્યો હતો. રાજ્યની આઠ મહાનગરપાલિકાઓમાં તા.૪થી ૧૨ ઑગસ્ટ દરમિયાન યોજાયેલી રાજ્યવ્યાપી ‘તિરંગા પદયાત્રા'નો સુરત મહાનગરથી શુભારંભ કરાવતા મુખ્યમંત્રીશ્રી ભૂપેન્દ્ર પટેલે સ્પષ્ટપણે જણાવ્યું હતું કે, દેશની એકતા, અખંડિતતા અને ‘એક ભારત, શ્રેષ્ઠ ભારત'ના પ્રતીક તિરંગાને દેશનાં તમામ ઘરોમાં લહેરાવવાના વડાપ્રધાનશ્રી નરેન્દ્રભાઈ મોદીએ કરેલા આહ્વાનને રાજ્ય સરકાર ઝીલી લઈને રાજ્યના એક કરોડ ઘરો પર તિરંગો લહેરાવવા સંકલ્પબદ્ધ છે.