‘આઝાદી કા અમૃત મહોત્સવ' અંતર્ગત સ્વાવલંબન અને આત્મનિર્ભરતાનો ‘ખાદી ઉત્સવ' ઊજવાયો

વડાપ્રધાનશ્રી નરેન્દ્રભાઈ મોદીએ અમદાવાદમાં સાબરમતી રિવરફ્રન્ટ ખાતે ખાદી ઉત્સવમાં ભાગ લીધો

દેશની આઝાદીનાં ૭૫ વર્ષ પૂર્ણ થવાના અવસરે આયોજીત ‘આઝાદી કા અમૃત મહોત્સવ' અંતર્ગત અમદાવાદના સાબરમતી રિવરફ્રન્ટ ખાતે સ્વાવલંબન અને આત્મનિર્ભરતાનો અનોખો સંદેશો આપતો ‘ખાદી ઉત્સવ’ ઊજ્વાયો હતો. વિશ્વના આ સૌથી મોટા ‘ખાદી ઉત્સવ’માં દેશના દીર્ઘદ્રષ્ટા વડાપ્રધાનશ્રી નરેન્દ્રભાઈ મોદી પણ સહભાગી થયા હતા. સાબરમતી રિવરફ્રન્ટ ખાતે યોજાયેલા ‘ખાદી ઉત્સવ'માં દેશની આઝાદીનાં ૭૫ વર્ષ નિમિત્તે ૭,૫૦૦ બહેનો-માતાઓએ એકસાથે અંબર ચરખા પર સૂતર કાંતીને રેકોર્ડ બનાવ્યો હતો. આ કાર્યક્રમમાં ઉપસ્થિત રહેલા વડાપ્રધાનશ્રીએ જણાવ્યું હતું કે, આઝાદીનાં ૭૫ વર્ષ પૂર્ણ થયાના અવસરે સાબરમતીના કાંઠે ૭,૫૦૦ ખાદી કારીગરોએ એકસાથે ચરખા પર સૂતર કાંતીને નવો ઇતિહાસ રચ્યો છે.

વડાપ્રધાનશ્રીએ ખાદીની મહત્તા વર્ણવતા જણાવ્યું હતું કે, આજે વિશ્વ આખામાં ટકાઉ જીવનની વાત ચાલે છે, તેવા સમયે ખાદી સસ્ટેનેબલ ક્લોથિંગ પુરવાર થાય તેમ છે. સાથે સાથે ખાદી એ ઇકો ફ્રેન્ડલી અને સસ્ટેનેબલ ક્લોધિંગનું શ્રેષ્ઠ ઉદાહરણ હોવાનું તેમણે ઉમેર્યું હતું. તેમણે વધુમાં જણાવ્યું હતું કે, ખાદી આપણી વિરાસતનું અભિન્ન અંગ છે અને તેના ઉપર ગર્વ કરીશું તો દુનિયા પણ માન આપશે. ક્લાઇમેટ ચેન્જના કારણે તાપમાન વધુ રહે છે તેવા દેશોમાં જે પરિસ્થિતિ સર્જાઈ છે તેમાં ખાદીને લોકલથી ગ્લોબલ થવામાં કોઈ શક્તિ રોકી શકશે નહીં તેવો વિશ્વાસ પણ વડાપ્રધાનશ્રીએ વ્યક્ત કર્યો હતો.

સાબરમતી નદીના તટ ખાતે ખાદી ઉત્સવમાં ૭,૫૦૦ જેટલા ખાદી કારીગરોએ એકસાથે ચરખો કાંત્યો હતો. જ્યારે વડાપ્રધાનશ્રીએ બારડોલી સત્યાગ્રહમાં ઉપયોગમાં લેવાયેલ ચરખો કાંતીને પ્રેરણાત્મક સંદેશો પાઠવીને ખાદી કારીગરો સાથે સંવાદ પણ સાધ્યો હતો.

વડાપ્રધાનશ્રીએ ગુજરાત રાજ્ય ખાદી ગ્રામોદ્યોગ બોર્ડના અત્યાધુનિક સુવિધાઓથી સજ્જ નવીન કાર્યાલય ભવનનું પણ ઇ-લોકાર્પણ કરીને પ્રજાજનોની સેવામાં અર્પણ કર્યું હતું.

આ ઉપરાંત વડાપ્રધાનશ્રીએ અમદાવાદ શહેરના સાબરમતી રિવરફ્રન્ટ ખાતે રૂ.૭૪ કરોડના ખર્ચે નવનિર્મિત આઇકોનિક અટલ બ્રિજનું ઇ-લોકાર્પણ કરીને અમદાવાદીઓને નવા નજરાણાની ભેટ ધરી હતી.