ચલો બુલાવા આયા હૈ, માતાને બુલાયા હૈ..

નવરાત્રિમાં કચ્છનાં દેશદેવી મા આશાપુરાનાં દર્શન અને પદયાત્રાનું ભારે મહત્ત્વ હોય છે. લૉકડાઉન કાળમાં પદયાત્રા બંધ રહી હતી. ગત વર્ષે મંદિર ખુલ્લું હોવા છતાં પદયાત્રી કેમ્પ ન હોવાથી વધુ ભાવિકો પગે ચાલીને આવ્યા નહોતા. આ વર્ષે કોરોનાનો ભય ઓસર્યો છે, એકાદ કિલોમીટરના અંતરે એકાદ બે સેવા-કેમ્પ ચાલુ થયા છે, ત્યારે પદયાત્રીઓ પણ મોટી સંખ્યામાં માતાજીનાં દર્શને જઈ રહ્યાં છે.

- સુચિતા બોઘાણી કનર

કચ્છના દેશદેવી તરીકે ઓળખાતાં મા આશાપુરા પ્રત્યે દરેક કચ્છી ભારે આસ્થા ધરાવે છે. નવરાત્રિના દિવસો દરમિયાન, તે પહેલાં કે તે પછી માતાનાં દર્શન કરવા બધા ઇચ્છુક હોય છે. આસો અને ચૈત્રી નવરાત્રિ દરમિયાન મોટી સંખ્યામાં ભાવિકો માતાનાં બેસણાં જ્યાં છે, તે માતાના મઢે પહોંચે છે. પદયાત્રીઓ પણ દિવસ-રાત જોયા વગર દૂર દૂરથી અનેક મુશ્કેલીઓ સહન કરીને માતાના મઢે આવે છે. પદયાત્રીઓની મુશ્કેલીઓ હળવી બને તે હેતુથી અનેક સેવા કેમ્પોમાં સેવા થાય છે. માતાના મઢ જાગીર ખાતે પણ પદયાત્રી સહિત આવનારા લાખો ભાવિકોની વ્યવસ્થા જળવાય તે હેતુથી તડામાર તૈયારીઓ થાય છે. કોરોનાના કપરા સમય પછી આ વર્ષે પૂર્ણ સ્વરૂપે પદયાત્રા અને નવરાત્રિ યોજાઈ રહી છે. ત્યારે લોકોમાં પણ તે માટેનો ભારે ઉત્સાહ જોવા મળી રહ્યો છે.

કચ્છમાં રાજકોટ, જૂનાગઢ, જામનગર, પડધરી, મોરબી સહિતના સૌરાષ્ટ્ર, ઉત્તર-દક્ષિણ ગુજરાત, મહારાષ્ટ્ર વગેરે જગ્યાએથી પદયાત્રીઓ આવે છે. મુંબઈથી સાઇકલ સવારોનું ગ્રૂપ પણ માતાના મઢે નિયમિત આવે છે. કચ્છના પ્રવેશદ્વાર સામખિયાળીથી માતાના મઢ સુધીના ૧૯૦૧૯૫ કિ.મી.ના રસ્તામાં અંદાજે ૪૫૦ જેટલા સેવા-કેમ્પમાં પદયાત્રીઓની સેવા થશે. ઉપરાંત સેંકડોની સંખ્યામાં હરતાં-ફરતાં સેવા-કેમ્પ પણ પદયાત્રીઓની સુવિધાઓનો ખ્યાલ રાખે છે.

આજથી ૩૦-૪૦ વર્ષ પહેલાં પદયાત્રામાં મોટી સંખ્યામાં મોટી ઉંમરના લોકો દેખાતા હતા, પરંતુ હવે ૧૮થી ૩૦ વર્ષના યુવાનો અને યુવતીઓ વધુ જોવા મળે છે. સાથે-સાથે નાનાં બાળકોને આંગળીએ વળગાડીને નિકળેલા, સાવ નાના બાળકને બાબાગાડીમાં બેસાડીને આવતાં કે નવજાત શિશુઓને ખભે તેડીને આવતાં અનેક માતા-પિતા પણ પદયાત્રામાં જોડાયેલાં જોવા મળે છે. વૃદ્ધો, દિવ્યાંગજનો પણ આસ્થાભેર આ પદયાત્રાનો ભાગ બને છે. અમુક ભાવિકો નાળિયેર ગબડાવતાં તો અમુક માથા પર બેડું રાખીને કે અમુક દંડવત્ કરતાં કરતાં માતાજીના દરબારમાં જતાં જોવા મળે છે.