મહિલા ‘શ્રમજીવી-દેવી' ઇલાબહેન ભટ્ટ

ગુજરાતમાં જન્મેલાં બે વ્યક્તિત્વ અનુસૂયાબહેન સારાભાઈ અને ઇલાબહેન ભટ્ટ એ બે એવાં વ્યક્તિત્વ છે કે જેમણે શ્રમિકસેવાને જીવન સમર્પિત કર્યું ’ને તેમની સ્થાપેલી સંસ્થાઓ વૈશ્વિક ઓળખ ધરાવતી બની

- મણિલાલ એમ. પટેલ

દેશનાં ૧૧ જેટલાં રાજ્યોની ૨૦ લાખ જેટલી શ્રમજીવી મહિલાઓનાં મસીહા સમાં ઇલાબહેન ભટ્ટે ૯૦ વર્ષની વયે તેમની ‘સેવાલીલા’ સંકેલીને વિદાય લીધી. આપણું દુર્ભાગ્ય એ છે કે આપણા દેશમાં જાહેરજીવન એટલે માત્ર રાજકારણ એવી માન્યતા દૃઢ થઈ ગઈ છે. પરિણામે રાજનેતાઓ વિશે જેટલું બોલાય, લખાય છે તેટલું ભાગ્યે જ અન્ય ક્ષેત્રોમાં સફળ ’ને જીવન સમર્પિત કરનારા માટે લખાય-બોલાય યા તેમના વિશે વધુ લોકો જાણતા હોય તેવું બનતું નથી.