લગ્નને સ્મરણીય બનાવવા માટે હમ સાથ સાથ હૈ..

લગ્નગાળાની શરૂઆત થઈ ગઈ છે, એ સાથે લગ્નપ્રસંગને ઉત્તમ કઈ રીતે બનાવવો તેના વિચારોના બજારમાં પણ તેજી આવી છે. પહેલાંના સમયમાં આંગણે મંડપ બંધાય એટલે દીકરી કે દીકરો ઘરની બહાર ન નીકળી શકે, પરંતુ હવે એવું નથી રહ્યું. હવે તો લગ્નના દરેક પ્રસંગ કે વિધિ સાથે મળીને કરવાની નવી પ્રથા ચાલી રહી છે. જેમાં સંગીતની વાત તો સાવ જુદી જ છે. હવે અતિથિ અને યજમાન બંને પક્ષ સાથે મળીને લગ્નનો આનંદ માણે છે.

જીજાજી..જીજાજી..હોને વાલે જીજાજી..' ‘અરે આર્યા, તું આ કેવા ગીત પર ડાન્સ કરીશ?’

‘નિત્યા દીદી, હું તો જીજુ પર બનેલા દરેક ગીત પર ડાન્સ કરવાની છું, તું જોજે ને, તારા સાસરી પક્ષવાળા તો જોતાં જ રહી જશે.'

‘અરે, અમારી પણ જોરદાર તૈયારીઓ ચાલી રહી છે.’ એમ કહેતાં નિત્યાની બંને ફોઈ વાતમાં જોડાઈ.

‘ફોઈ તમે પણ પ્રેક્ટિસ કરી રહ્યાં છો?’

‘અરે, તારી ફોઈઓ જ નહીં, પણ આ બંને ફુઆ પણ રોજ બે બે કલાક ડાન્સની પ્રેક્ટિસ કરે છે.’

‘અમે મામા પણ પાછળ નથી હોં' એમ કહેતા નિત્યાનાં મામા-મામી પણ લહેકો કરતાં આવ્યાં. નિત્યાના લગ્નને એક મહિનાની વાર છે, પરંતુ તેની નાની બહેન આર્યા, મમ્મી-પપ્પા, ફોઈ-ફુઆ, મામા-મામી અને તેની સખીઓ બધાં મળી કોરિયોગ્રાફર પાસે ડાન્સ શીખી રહ્યાં છે. ફોઈ અને મામા તો બીજા શહેરમાં રહે છે, પરંતુ અઠવાડિયામાં બે દિવસ પ્રેક્ટિસ કરવા આવી જાય છે. નિત્યાના સાસરીવાળા પણ નૃત્ય માટે ખાસ તૈયારી કરી રહ્યાં છે, કારણ કે નિત્યા અને નિયમની સંગીત સંધ્યા એક પાર્ટી પ્લોટમાં સાથે રાખવામાં આવી છે. જી હા, નિત્યા અને નિયમે નક્કી કર્યું હતું કે, આપણાં લગ્નની દરેક વિધિ એક સાથે જ અને એક જ સ્થળ પર કરીશું. જેમાં આપણે બંને તો મજા માણીશું જ, સાથે-સાથે બંને પરિવાર પણ એકબીજાની દરેક વિધિમાં હાજર રહી શકે અને લગ્નનો આનંદ બેવડાઈ જાય.

હવે એ જમાનો ગયો જ્યાં લગ્ન પછી વીડિયોમાં યુવતીને ખબર પડે કે પોતાની સાસરીમાં વિધિ કેવી રીતે કરવામાં આવી હતી. આજે તો યુગલ એક જ જગ્યા પર સાથે મળીને લગ્નના દિવસોને યાદગાર બનાવે છે. કંકોતરી લખવાથી લઈને, મહેંદી રસમ, માંડવા મુહૂર્ત, ગ્રહશાંતિ, લગ્નગીતો અને સંગીત સંધ્યા જેવા દરેક કાર્યક્રમ એક સ્થળે સાથે મળીને કરવામાં આવે છે.