લગ્ન અને વિઝા

તમે જો છેતરપિંડી આચરો, કોઈ પરદેશીને અમેરિકામાં ખોટી રીતે ઘૂસાડવામાં મદદ કરો, તો તમારું એ જુઠ્ઠાણું પકડાતા તમને ખૂબ જ ગંભીર સજા થઈ શકે છે

- ડો.સુધીર શાહ

માનસીનો પ્રેમી મહેશ એને કહ્યા વગર જ એનાં માતાપિતા જોડે ડિપેન્ડન્ટ ઇમિગ્રન્ટ વિઝા ઉપર અમેરિકા ચાલી ગયો. ત્યાં ગયા પછી એણે માનસીને એ વાતની જાણ કરી અને જણાવ્યું કે, ‘હું જો તને આ વાત પહેલેથી કહેત તો કદાચ તું મને અમેરિકા જવા જ ન દેત. આથી મેં વિચાર્યું કે હું તો હજુ માંડ વીસ વર્ષનો છું અને તું ઓગણીસની છે એટલે હું મારાં માતાપિતા જોડે ડિપેન્ડન્ટ વિઝા ઉપર અમેરિકા ચાલી જઉં. અહીં ગ્રીનકાર્ડ મેળવું અને પછી ઇન્ડિયા આવી તારી જોડે લગ્ન કરું અને ત્યાર બાદ તારા માટે ફૅમિલી સેક્વડ (એ) પ્રેફરન્સ કૅટેગરી હેઠળ ગ્રીનકાર્ડની પિટિશન દાખલ કરું અને તું બે વર્ષની અંદર અમેરિકા આવી શકે, પણ મારી આ ધારણામાં એક વાંધો આવી ગયો છે. વિઝા આપતા મારી ઉપર કોન્સ્યુલર ઓફિસરે એવી શરત મૂકી છે કે મારે બે વર્ષ સુધી લગ્ન ન કરવા. એટલે હવે હું બે વર્ષ પછી ઇન્ડિયા આવીશ અને આપણે લગ્ન કરીશું, પછી હું તને અમેરિકા બોલાવી લઈશ. તું મારી વાટ જોજે. હું તને ખૂબ ખૂબ પ્રેમ કરું છું.’

માનસીને આ જાણીને આઘાત લાગ્યો. દુ:ખ પહોંચ્યું, પણ એ મહેશને એટલું બધું ચાહતી હતી કે એણે એને માફ કરી દીધો અને બે વર્ષ પૂરાં થાય પછી મહેશ ઇન્ડિયા આવીને એની જોડે લગ્ન કરે એની વાટ જોવા લાગી.