‘વિસામો’ શિક્ષણનું શ્રેષ્ઠ માધ્યમ

શાળાઓમાં પ્રવેશ પ્રક્રિયા શરૂ થઈ ગઈ છે, ધનિક બાળકો ઉચ્ચ અંગ્રેજી મીડિયમની શાળાઓમાં પ્રવેશ મેળવી રહ્યાં છે, તો વળી ગરીબ બાળકો નિત્યક્રમ પ્રમાણે સરકારી શાળાઓમાં જઈ રહ્યાં છે, પરંતુ ઘણાં બાળકો એવાં પણ છે જેમનામાં ભણવાની ધગશ તો ખૂબ છે, પરંતુ અભ્યાસ માટે પરિસ્થિતિ સાથ નથી આપતી. આવાં બાળકો માટે ‘વિસામો’ શિક્ષણનું શ્રેષ્ઠ માધ્યમ બન્યું છે.

- હેતલ રાવ

‘અરે, રોજ આમ બપોર પડે ને ક્યાં દોડે છે, જો સિગ્નલ બંધ થયું, જા ધંધાનો ટાઇમ છે, પાંચ ગાડીઓ લૂછીશ તો બે ગાડીવાળા પૈસા આપશે, આમ ક્યાં જાય છે?’ એટલું બોલતાં બોલતાં તો આશાની માતાએ રાડ પાડી, પરંતુ સાંભળે તો આશા કેવી, આશા સિગ્નલ પર કાર લૂછીને બે પૈસા કમાય છે અને માતાને મદદ કરે છે, પરંતુ બપોરે ૨ વાગે એટલે આશા પોતાનું સિગ્નલ છોડી પાછળના ચાર રસ્તે દોડી જાય છે. એ મોટા સિગ્નલ પરથી રોજ સ્કૂલ બસો પસાર થાય, તેમાં બેઠેલા શાળાના ગણવેશમાં એટીકેટ વિદ્યાર્થીઓને જોઈને આશા ખૂબ જ ખુશ થઈ જાય છે. તેની ખૂબ જ મહેચ્છા છે, ઉચ્ચ અભ્યાસ કરીને એન્જિનિયર બનવાની, પરંતુ પરિસ્થિતિ તેના સપોર્ટમાં નથી. પહેલાં તો સરકારી શાળામાં પણ જતી, પરંતુ પરિવારના ભરણપોષણ માટે તેણે પોતાનાં સપનાંને બંધ આંખોની અંદર જ રહેવા દીધાં, પરંતુ કહેવાય છે ને કે, જ્યારે ઈશ્વર આપવા બેસે ત્યારે ક્યાં કશુંય જુએ છે, આશાને વિસામોનો સથવારો મળ્યો. સંસ્થાના સંચાલકોએ આશાની અભ્યાસ અંગેની લાગણીને પારખી લીધી, તેની ચપળતા પરીક્ષામાં જોવાઈ. સંસ્થાએ આશાના પરિવારનો સંપર્ક કરી માતાને ખૂબ સમજાવી. અંતે માતાને લાગ્યું કે, મારી દીકરી અભ્યાસ કરી કંઈક કરશે તો પાછળ તેનાં ભાઈ-બહેનનું ભવિષ્ય પણ સુધરી જશે. આજે આશા એન્જિનિયર છે અને માતા માટે તેણે સુંદર ઘર બનાવ્યું છે. વિસામોમાં આવી એક આશા નથી, અગણિત બાળકો છે, જે આજે શહેરની નામાંકિત શાળાઓમાં અભ્યાસ કરીને પોતાનાં સપનાં સાકાર કરી રહ્યાં છે. ત્યારે વિસામો અને તેના લક્ષ્ય વિશે જાણવું રસપ્રદ છે.

મેં ક્યારેય વિચાર્યું પણ ન હતું કે મારી દીકરી એક દિવસ નિકટ જેવી પરીક્ષા પાસ કરશે : દીકરી દ્રષ્ટિ સાથે પિતા રમેશભાઈ મકવાણા