સ્ત્રીસશક્તિકરણ માટે મહત્ત્વનાં છેઃ સ્રી, સમાજ અને સમાનતાની સમજ

વર્તમાન સમયમાં વધુ પ્રમાણમાં સ્ત્રીઓ આર્થિક રીતે સ્વતંત્ર બની છે, પરંતુ સામાજિક ધોરણે જે પ્રયાસો થઈ રહ્યા છે તે પૂરતા નથી એવું જણાઈ રહ્યું છે. આ માટે ઘણાં બધાં કારણો જવાબદાર છે, પરંતુ જો કોઈ સૌથી મોટું અને મહત્ત્વનું કારણ હોય તો તે છે અસમાનતાનો ભાવ

- હેતલ ભટ્ટ

સ્ત્રી અને પુરુષ સમાજના બે મહત્ત્વના સ્તંભ છે. કોઈ એક જ સ્તંભ મજબૂત હોય તો સમગ્ર ભાર તેના ખભા પર આવી જાય છે અને કેટલીકવાર અસંતુલનની સ્થિતિ સર્જાય છે, પણ જ્યારે બંને સ્તંભ મજબૂત હોય તો જવાબદારીઓ બે ભાગમાં વહેંચાઈ જાય છે. પારિવારિક, સામાજિક, આર્થિક વગેરે બાબતોમાં આ વાત લાગુ પડે છે. જો વાત કરીએ સ્ત્રીના આર્થિક સશક્તિકરણની તો પહેલાંના સમય કરતાં હવે તેમાં સુધારો આવ્યો છે. વર્તમાન સમયમાં વધુ પ્રમાણમાં સ્ત્રીઓ આર્થિક રીતે સ્વતંત્ર બની છે, પરંતુ સામાજિક ધોરણે જે પ્રયાસો થઈ રહ્યા છે તે પૂરતા નથી એવું જણાઈ રહ્યું છે. આ માટે ઘણાં બધાં કારણો જવાબદાર છે, પરંતુ જો કોઈ સૌથી મોટું અને મહત્ત્વનું કારણ હોય તો તે છે અસમાનતાનો ભાવ. આજની તારીખે પણ આર્થિક મોરચે સ્ત્રી અને પુરુષોની સરખામણીમાં સ્ત્રીઓને વ્યવસાયિક ધોરણે આગળ વધવા, પોતાનું ગમતું કામ કરવા કે શોખ પૂરા કરવા, આર્થિક રીતે સક્ષમ બનવા, આત્મનિર્ભર બનવા સમાજ દ્વારા મળવું જોઈએ તેટલું પ્રોત્સાહન નથી મળી રહ્યું. આપણે સહુએ એક વાત સમજવી પડશે કે સ્ત્રી જ્યારે આર્થિક રીતે સક્ષમ બને છે, પગભર બને છે ત્યારે તેની સાથે માત્ર સ્ત્રીની એકલીની જ ઉન્નતિ નથી થતી, પરંતુ સમગ્ર ઘરની અને પરિવારની પણ ઉન્નતિ થાય છે.