એમ-૧ વિઝાઃ વોકેશનલ સ્ટુડન્ટ્સ માટે

બી-૧/બી-૨ વિઝા જે વ્યાપારીઓ, પર્યટકો માટેના છે એના અરજદારોએ જે રીતે એમના સ્વદેશના કૌટુંબિક, નાણાકીય સંબંધો દેખાડવાના રહે છે એટલા સખ્ત આ સંબંધો એમ-૧ વિઝાના અરજદાર વિદ્યાર્થીઓએ દેખાડવાના નથી રહેતા, કારણ કે તેઓ જુવાન હોય છે

- ડો.સુધીર શાહ

ધ ઇમિગ્રેશન એન્ડ નેશનાલિટી ઍક્ટ, ૧૯૫૨ની કલમ ૧૦૧(એ) (૧૫) (એમ) વોકેશનલ કે નોન એકેડમિક સ્ટુડન્ટ કોને કહેવાય એની વ્યાખ્યા આપે છે અને રેગ્યુલેશન ૮ સીએફઆરની કલમ ૨૧૪.૨(એમ) આવા વોકેશનલ કે નોન-એકેડમિક સ્ટુડન્ટોની શું લાયકાત હોવી જોઈએ જેથી એમને અમેરિકામાં પ્રવેશ આપવામાં આવે, તેઓ ત્યાં કેટલો સમય રહી શકે, રહેવાનો સમય પૂરો થતાં વધુ રહેવાની જરૂર પડે તો શું કરતા એમનો રહેવાનો સમય વધારી શકાય, તેઓએ જે સ્કૂલ યા શૈક્ષણિક સંસ્થામાં ભણવા માટે, વોકેશનલ કોર્સ કરવા માટે પ્રવેશ મેળવ્યો હોય એની ફેરબદલી કરવી હોય તો એ માટે શું કરવું જોઈએ? પ્રેક્ટિકલ ટ્રેનિંગ લેવી હોય, નોકરી કરવી હોય, સ્ટુડન્ટ સ્ટેટસનો કંઈ કરતા અંત આવ્યો હોય તો ફરી પાછું કેમ મેળવવું જોઈએ? આવા આવા વોકેશનલ સ્ટુડન્ટ વિઝાને લગતા બધા નિયમો એમાં આપવામાં આવ્યા છે. રેગ્યુલેશન ૨૨ સીએફઆર સેક્શન ૪૧.૬૧ આવા વોકેશનલ ’ને નોન-એકેડમિક સ્ટુડન્ટોને કચારે વિઝા આપવા એ દર્શાવે છે. વોકેશનલ અથવા તો નોન-એકેડમી સ્ટુડન્ટ જેઓ નોનઇમિગ્રન્ટ શ્રેણીના એમ-૧ વિઝા મેળવીને અમેરિકામાં ભણવા જાય છે એમને એમનો શિક્ષણનો જે પિરિયડ હોય એટલો સમય અને એ ઉપરાંત બીજા ત્રીસ દિવસ અમેરિકામાં રહેવા માટે અપાય છે. આ સમય એક વર્ષ કરતાં વધુ હોવો ન જોઈએ. એમ-૧ વોકેશનલ અથવા નોન-એકેડમી સ્ટુડન્ટ વિઝા મેળવવા ફોર્મ ડીએસ-૧૬૦ ભરવાનું રહે છે.