સમાન નાગરિક સંહિતાઃ સવાલ એના બંધારણીય સ્વરૂપનો છે

૭૫ વર્ષે પણ વણઉકેલ્યો રહેલો અને સમાજના તમામ વર્ગોને સ્પર્શતો આ પેચીદો છતાં અત્યંત મહત્ત્વપૂર્ણ મુદ્દો શું છે, તે દેશના પ્રત્યેક નાગરિકે ઊંડાણથી સમજવા પ્રયત્ન કરવો જોઈએ

- સુધીર રાવલ

આજકાલ દેશમાં યુનિફૉર્મ સિવિલ કોડ એટલે કે સમાન નાગરિક સંહિતાની વ્યાપક ચર્ચા ચાલી રહી છે. અગાઉનાં વર્ષોમાં પણ તે ચાલતી રહી છે, પરંતુ ખાસ કરીને ચૂંટણી આવે ત્યારે અને આ વખતે જરા વધુ ગંભીરતાપૂર્વક ચર્ચા થઈ રહી છે, એટલે સામાન્ય નાગરિકને તેના વિષે વધુ જાણવાની જિજ્ઞાસા થાય તે સ્વાભાવિક છે. દેશમાં ચાલતી સમગ્ર ચર્ચામાં વાતાવરણ એવું બનેલું છે, યા તો બનાવવામાં આવી રહ્યું છે કે જાણે મુદ્દો હિન્દુઓના હિતમાં અને મુસલમાનોની વિરુદ્ધનો છે. રાજકીય સ્તરે જોકે આટલો જ સંદેશ ફેલાવવાનો હેતુ હોય તો ચૂંટણી એ યોગ્ય સમય જ કહેવાય, પરંતુ ૭૫ વર્ષે પણ વણઉકેલ્યો રહેલો અને સમાજના તમામ વર્ગોને સ્પર્શતો આ પેચીદો છતાં અત્યંત મહત્ત્વપૂર્ણ મુદ્દો શું છે, તે દેશના પ્રત્યેક નાગરિકે ઊંડાણથી સમજવા પ્રયત્ન કરવો જોઈએ.