ચંદ્રયાન-૩નું મોટા ભાગનું કામ અમદાવાદમાં થયું છે

ભારતમાં ઇસરોએ ચંદ્ર પર સૌથી વધુ જોખમી સ્થળ દક્ષિણ ધ્રુવ પર સુરક્ષિત લેન્ડિંગ વિસ્તાર શોધી કાઢ્યો છે. લેન્ડર ચંદ્રના દક્ષિણના ધ્રુવ પર ઊતરશે. ત્યાં આજ સુધી કોઈ દેશ ગયો નથી

ચંદ્રયાન-૨ શાને કારણે નિષ્ફળ નિવડ્યું હતું? પૅરામીટરની વિવિધતાને સંભાળવાની ક્ષમતાની કમી અથવા ડિસપર્સન મર્યાદિત હોવાને કારણે. આ વખતે ઇસરોએ આ ક્ષમતા વિસ્તારી છે. ક્યાં ગરબડ થઈ શકે તેમ છે, તેને ધ્યાનમાં રાખીને આ વખતે ઇસરોએ સફળતા આધારિત ડિઝાઇનને બદલે નિષ્ફળતા આધારિત ડિઝાઇનથી ચંદ્રયાન-૩ તૈયાર કર્યું છે. ૧૪ જુલાઈ બપોરે ૨.૩૫ મિનિટે લૉન્ચ થનાર ચંદ્રયાન ઑગસ્ટની ૨૩ અથવા ૨૪મીએ ચંદ્રની સપાટી પર ઉતરાણ કરશે. ઇસરોની ટીમ ચંદ્રયાન-૨ના ક્રેશ લૅન્ડિંગ પછીથી તરત જ ચંદ્રયાન-૩ની તૈયારીમાં વ્યસ્ત બની ગઈ હતી. ચંદ્રયાન-૩માં અંદાજે ૨૧ ફેરફારો કરવામાં આવ્યા છે. તેમાં અલ્ગોરિધમ પ્રોસેસિંગ અને સેન્સર તેમ જ હાર્ડવેર વગેરેનો સમાવેશ થાય છે. આ વખતે એલડીવી એટલે કે લેસર ડોપલર વેલોસીમીટર નામનું સેન્સર યાનની ગતિને ત્રણ દિશામાં માપશે, જેથી ચોકસાઈ મળશે. લેસર અલ્ટિમીટર અને રડાર અલ્ટિમીટર સુધાર્યા, કૅમેરા રિઝોલ્યુશનમાં સુધારા કર્યા છે. હાર્ડવેર, સોફ્ટવેર પ્રોસેસિંગ અલ્ગોરિધમમાં બદલાવ કર્યો છે. ટેસ્ટમાં થનાર ક્ષતિને દૂર કરાઈ છે.