પસંદગી કેમ કરવી?

જે રિજનલ સેન્ટરમાં રોકાણ કરવાનો વિચાર કરતા હો એના પ્રમોટરો કોણ છે એ સૌપ્રથમ જાણી લેજો. એ પ્રમોટરોનો ટ્રેક રેકોર્ડ કેવો છે એ જરૂરથી જાણવો જોઈએ

- ડો.સુધીર શાહ

અમેરિકા કાયમ રહેવા જવું હોય એ માટે એ દેશનું ગ્રીનકાર્ડ મેળવવું હોય તો તમારાં માતાપિતા યા ભાઈબહેન કે પતિપત્ની અમેરિકન સિટીઝન હોવા જોઈએ. તેઓએ તમારા લાભ માટે ઇમિજેટ રિલેટિવ કૅટેગરી અથવા તો ચાર જુદી-જુદી ફૅમિલી પ્રેફરન્સ કૅટેગરી હેઠળ ઇમિગ્રન્ટ વિઝાની પિટિશન દાખલ કરી હોવી જોઈએ. એની હેઠળ ગ્રીનકાર્ડ પ્રાપ્ત થાય એ માટે વર્ષોની વાટ જોવા માટે તમે રાજી હોવા જોઈએ.

જો કોઈ અમેરિકન માલિક તમને એમની કંપનીમાં નોકરી આપવા રાજી હોય તો તેઓએ તમારા માટે લેબર સર્ટિફિકેશન કરાવવાની જહેમત લેવી પડે અને એ માટે પુષ્કળ ખર્ચો કરવો પડે. ત્યાર બાદ એમણે ચાર જુદી-જુદી ઍમ્પ્લૉયમૅન્ટ બેઝ્ડ પ્રેફરન્સ કૅટેગરી હેઠળ તમારા લાભ માટે ગ્રીનકાર્ડની પિટિશન દાખલ કરવી પડે. એની હેઠળ તમને ગ્રીનકાર્ડ પ્રાપ્ત થાય એ માટે તમારે પુષ્કળ પુષ્કળ ધીરજ રાખવી જોઈએ.

જો તમે ભારતની બહાર જન્મ્યા હોવ યા ભારતની બહાર જન્મેલ વ્યક્તિ જોડે લગ્ન કર્યા હોય તો ગ્રીનકાર્ડ લોટરીમાં ભાગ લઈ શકો છો, પણ એમાં નસીબવંતા વિજેતાઓ જ ગ્રીનકાર્ડ મેળવી શકે છે.

અનેકો રાજકીય આશરો એટલે કે અસાયલમ માગીને અમેરિકામાં કાયમ રહેવા ચાહે છે. આજે અસાયલમ માગતી વ્યક્તિઓની સંખ્યા સેંકડોમાં છે. એમને અસાયલમ મળે ત્યાં સુધી જે લાંબી વાટ જોવાની હોય છે એમાં એમની હાલત બહુ બૂરી હોય છે.