વિઝા વિમર્શ

રોકટોક વગર પ્રવેશ (અમેરિકા અને આપણે)

- ડો.સુધીર શાહ

કોલંબસે ૧૪૯૨માં અમેરિકા ખંડની અનાયાસે શોધ કરી એ વખતે યુરોપ અને ઇંગ્લેન્ડમાં કટોકટીની પરિસ્થિતિ હતી. રાજાઓ અને ધર્મગુરુઓ વચ્ચે ભેદભાવો હતા, તેઓ અંદરોઅંદર ઝઘડતા અને લડતા હતા. એ બંને એમની પ્રજાને અને ભક્તોને રંજાડતા હતા, બટાટાનો દુકાળ પડ્યો હતો. પ્લેગનો રોગચાળો ફાટી નીકળ્યો હતો. આ બધાં કારણોસર યુરોપ ના તેમ જ ઇંગ્લેન્ડના લોકોએ અમેરિકા ભણી દોટ મૂકી.

શરૂઆતમાં એમને અમેરિકામાં પ્રવેશતાં કોઈ અટકાવનારું નહોતું. ત્યાંના મૂળ વતનીઓ, જેમને કોલંબસે ‘રેડ ઇન્ડિયનો’ તરીકે ઓળખાવ્યા હતા, એમનાં તીર-કામઠાં યુરોપ અને ઇંગ્લેન્ડના લોકોની બંદૂકો પાસે કારગત ન નીવડ્યાં. અમેરિકામાં પ્રવેશેલા આ નવા આગંતુકો રોજ સવારના એમની ઘોડાગાડી લઈને નીકળી પડે. ઘોડાઓને પૂરપાટ દોડાવે અને સાંજ સુધીમાં જેટલો પ્રદેશ વટાવી ચૂકે એ બધો એમનો! એ સમયની અમેરિકામાં જઈને વસેલા એ પરદેશીઓની આપસમાં આવી સમજણ હતી! ધીરે-ધીરે અમેરિકામાં યુરોપ અને ઇંગ્લેન્ડના લોકોનો ભરાવો થવા લાગ્યો. ત્યાં જઈને વસેલા લોકોને એવું લાગ્યું કે જો આમ જ બધા અમેરિકામાં આવતા થશે તો તેઓ આપણી સુખ-સંપત્તિમાં, આ જમીનોમાં, જમીનની નીચે દટાયેલ તેલ અને અન્ય ખનિજોમાં ભાગ પડાવશે. આટલું જ નહીં, પણ અનિચ્છનીય લોકોને તો આપણા આ નવા શોધાયેલા દેશમાં આવવા જ દેવા ન જોઈએ.