વિઝા વિમર્શ

પૈસો બોલે છે ( અમેરિકા અને આપણે)

- ડો.સુધીર શાહ

વર્ષો પહેલાં મુંબઈના પ્રિન્સેસ સ્ટ્રીટ વિસ્તારમાં આવેલા ભાંગવાડી થિયેટરમાં એક નાટક ભજવાયું હતું, ‘પૈસો બોલે છે’. આ નાટક પ્રેક્ષકોને ખૂબ ગમ્યું હતું. એમાંનો એક સંવાદ હતો, ‘આ તું નહીં, તારો પૈસો બોલે છે.’ આ મુજબ જ તમારું અમેરિકા જવાનું સ્વપ્નું ભલે હોય, પણ એ સાકાર કરવા માટે તમારી પાસે પૂરતા પૈસા હોવા જોઈએ.

તમે જ્યારે અમેરિકા કોઈ બિઝનેસના કામ માટે, ત્યાંના વેપારીઓને મળવા, એમના માલ-સામાનનો ઑર્ડર આપવા કે તમારા માલ-સામાનનો ઑર્ડર તેઓ લે એ માટે કે અમેરિકામાં ભરાતાં પ્રદર્શનો, એક્સ્પો, સેમિનારો આ સર્વેમાં ભાગ લેવા જવા ઇચ્છતા હોવ તો તમારે નોન-ઇમિગ્રન્ટ શ્રેણીના ‘બી-૧' વિઝા મેળવવા પડે છે. જો અમેરિકામાં આવેલાં જોવાલાયક સ્થળો જોવાની ઇચ્છા ધરાવતાં હોવ, ત્યાં રહેતાં તમારાં સગાંવહાલાંઓને મળવા જવા માગતા હોવ, મેડિકલ ટ્રીટમેન્ટ માટે જતાં હોવ, વિદ્યાર્થી હોવ અને ત્યાંની યુનિવર્સિટી માં અભ્યાસ કરવો હોય તો ત્યાંની યુનિવર્સિટીઓ કેવી છે એ જોવા જવાનો ઇરાદો ધરાવતા હોવ, તો તમારે નોન-ઇમિગ્રન્ટ શ્રેણીના ‘બી-૨’ વિઝાની માગણી કરવાની રહે છે. આ માટે ફોર્મ ડીએસ-૧૬૦ ઓનલાઇન ભરવાનું રહે છે.