ચર્નિંગ ઘાટ

શિવજીનો જોયેલો, છતાં ના જાણેલો અવતાર

- ગૌરાંગ અમીન

વિષાદમય અર્જુનને અપકીર્તિની ચિંતા સતાવતી હતી

 દુર્યોધન મંડળને પોતાને વખાણતી જીભ ભાવતી હતી

શિવોહમ્ શિવોહમ્ સચ્ચિદા નંદોહમ્ ગાતાં ગાતાં ભક્ત તરીકે પોતાની બહાર પોતાના ઈશ્વર શિવજીને નમવા માટે અસામાન્ય બુદ્ધિ જોઈએ, સાથે-સાથે વિશિષ્ટ ગાંડપણ જોઈએ. તમામ લોકના એક-એક અણુમાં શિવજી છે અને તે સાથે એ તમામ લોક શિવજીની અંદર છે તેવું માનતા હોવા છતાં સાધક શિવજીના સ્વરૂપનું પૂજન કરે છે. ઉપાસના કરનાર, ઉપાસ્ય અને ઉપાસના એ બધું શિવજી છે તે જાણેલું હોવા છતાં યોગી શિવજીના આકારને ભજે છે. શિવલિંગ આદિમ પ્રતીક છે, પ્રત્યય છે અને પ્રતિમા છે. શિવજીના ભૈરવ અવતાર સાધારણ જનમાં આઠ કહેવાય છે, વિશેષ જનમાં બાવન કે ચોસઠ કે તેત્રીસ મનાય છે. અગિયાર રુદ્ર અવતાર છે, તો શિવજીના ક્યાંક ઓગણીસ અને ક્યાંક અઠ્યાવીસ અવતાર ગણાવાય છે. અમુક નામરૂપ લોકભોગ્ય નથી એટલે કે સંસારમાં ખૂંપેલા જીવો માટે પ્રચલિત નથી. અમુક અવતાર નજીવા મનુષ્યમાં જાણીતા અને માનીતા હશે. ભવ પરથી અનુભવ આવે અને હિન્દુઓનો અનુભવ છે કે કલિયુગમાં કોઈ પણ દેવ કે દેવીની આરાધના બરાબર થાય તે માટે મંદિરની વ્યવસ્થા છે, તથાપિ શિવજીનો એક અવતાર બહુમતીએ મંદિરમાં જોયો છે, છતાં જાણ્યો નથી.