રાજકાજ

અરવિંદ કેજરીવાલની ધરપકડ કાનૂની રીતે યોગ્ય

દિલ્હી હાઈકોર્ટે ૯મી એપ્રિલે દિલ્હીના મુખ્યપ્રધાન અરવિંદ કેજરીવાલની ઇડી દ્વારા કરાયેલ ધરપકડને પડકારતી અરજીને કાઢી નાખી છે અને સાથોસાથ અદાલતે કરેલી કેટલીક ટિપ્પણીઓમાં કેજરીવાલની ધરપકડ સામે તેમના વકીલો તેમ જ આમ આદમી પાર્ટી દ્વારા અવારનવાર ઉઠાવવામાં આવતા મુદ્દાઓ પણ સ્પષ્ટ કરી દીધા છે. અરવિંદ કેજરીવાલ તેમની ધરપકડને ગેરબંધારણીય ગણાવતા રહ્યા છે અને ચૂંટણી વખતે તેમની ધરપકડને એક ષડયંત્ર ગણાવતા રહ્યા છે. પોતે મુખ્યપ્રધાન હોવાથી ધરપકડ ન થવી જોઈએ તેમ જ તેમના નિવાસ સ્થાને ઇડીએ દરોડા પાડવા જોઈએ નહીં તેવું પણ તેઓ કહેતા રહ્યા છે. દિલ્હી હાઈકોર્ટે તેના ચુકાદામાં આ બધી બાબતો અત્યંત સ્પષ્ટ કરી દીધી છે. અદાલતના જણાવવા પ્રમાણે એનફોર્સમેન્ટ ડિરેક્ટોરેટ દ્વારા એકત્ર કરવામાં આવેલા દસ્તાવેજો ઉપરથી જણાયું છે કે કેજરીવાલે ષડયંત્ર રચ્યું હતું અને ગુનાખોરીની આવકના ઉપયોગ અને તેને છુપાવવામાં સક્રિય રીતે સામેલ પણ હતા. તેઓ અંગત રીતે આમ આદમી પાર્ટીના સંયોજક તરીકે પણ તેમાં સામેલ હતા.