રિતિક રોશનના કારણે ગર્લફ્રેન્ડ સબા આઝાદને કામ નથી મળી રહ્યું?!

શું ખરેખર આજે પણ આપણે અંધકારના યુગમાં જીવી રહ્યા છીએ, જ્યાં એવું માની લેવામાં આવે છે કે કોઈ સ્ત્રી જો સફળ પુરુષ સાથે રિલેશનશિપમાં હોય તો તેને કમાવવાની જરૂર નથી? પોતાનાં ભાડાં અને બિલ્સ જાતે ભરી શકે તે માટે કમાવવાની જરૂર નથી?'

- પાર્થ દવે

સિંગર, એક્ટ્રેસ અને વોઇસ ઓવર આર્ટિસ્ટ સબા આઝાદ હાલ ચર્ચામાં છે. આમ તો પાછલાં અમુક વર્ષોથી ચર્ચામાં છે, તેનું કારણ રિતિક રોશન છે. સબા, રિતિક સાથે રિલેશનશિપમાં હોવાનું કહેવાઈ રહ્યું છે. વાત એમ છે કે, સબાએ તાજેતરમાં જણાવ્યું કે, રિતિક સાથે રિલેશનશિપમાં હોવાના કારણે તેને કામ મળવાનું બંધ થઈ ગયું છે!

સબાએ ઇન્સ્ટાગ્રામની એક સ્ટોરીમાં લખ્યું કે, ‘મૂળ જગ્યાએ પાછી આવી ગઈ છું. બે વર્ષ પછી વોઇસ ઓવર રેકોર્ડ કરી રહી છું.' આ સ્ટોરી બાદ સબાએ સ્ટોરીની હારમાળા મૂકી હતી, જેમાં તેણે એ અર્થનું લખ્યું હતું કે છેલ્લાં બે – અઢી વર્ષથી તેને કોઈ કામ મળ્યું નથી.

સબા આઝાદે લખ્યું હતું, ‘બે વર્ષ બાદ કેમ? તો તમારામાંથી ઘણાને કદાચ ખ્યાલ હશે અને ઘણાને ખ્યાલ ન પણ હોય કે હું છેલ્લાં પંદર વર્ષ કરતાં વધારે સમયથી વોઇસ ઓવર આર્ટિસ્ટ તરીકે કામ કરું છું. આ દરમિયાન મને ૨૦૦થી વધુ એડ ફિલ્મોમાં કામ કરવાનો મોકો મળ્યો છે. વોઇસ ઓવર આર્ટિસ્ટ એ મારા ત્રણ કરિયરમાંનું એક છે અને તે મારા માટે ક્રિએટિવ અને ફાઇનાન્સિયલી સારું રહ્યું છે. મેં અઢળક સારા દિગ્દર્શકો સાથે કામ કર્યું છે. અઢળક એડ્સ લ્મિમાં અવાજ આપ્યો છે. સામાન્ય રીતે દસ મહિને ૬થી ૮ વોઇસ ઓવર કરતી હતી, પરંતુ અઢી વર્ષથી અચાનક જ મને વોઇસ ઓવર આર્ટિસ્ટ તરીકેનું કામ મળતું બંધ થઈ ગયું.’