વિઝા વિમર્શ.

ખોટી માન્યતાઓ

- ડૉ.સુધીર શાહ

બે ચાર રીજનલ સેન્ટરોએ એમના હાથ ઊંચા કરીને નાદારી નોંધાવીને કે પછી નુકસાની દેખાડીને અથવા પલાયન થઈને પરદેશી રોકાણકારોના ઍમ્પ્લૉયર્મેન્ટ બેઝ્ડ ફિફ્થ પ્રેફરન્સ કૅટેગરી હેઠળ રોકાણ કરેલા પૈસા ડુબાડી દીધા છે. આથી એવી માન્યતા પ્રવર્તવા લાગી છે કે, ઇબી-૫ પ્રોગ્રામ હેઠળ રીજનલ સેન્ટરમાં રોકાણ કરવું ન જોઈએ. રીજનલ સેન્ટરમાં રોકાણ કરતાં તમારા રોકાણ કરેલાં નાણાં સેફ નથી. તમારે રીજનલ સેન્ટરમાં રોકાણ કરવાને બદલે જાતે જ અમેરિકામાં નવા બિઝનેસમાં રોકાણ કરવું જોઈએ અને એ બિઝનેસમાં ઓછામાં ઓછા દસ અમેરિકનોને ફુલટાઇમ નોકરી આપવી જોઈએ અને બિઝનેસ જાતે ચલાવવો જોઈએ. આથી તમારા પૈસા ડુબી જવાનો ભય નહીં રહે.

કોણે કહ્યું કે તમે જાતે બિઝનેસ કરો તો તમારા રોકાણ કરેલા પૈસા ડુબી નહીં જાય. શું તમને બિઝનેસ કરવાનો મહાવરો છે? અમેરિકામાં ક્યાં કયો બિઝનેસ કરવો જોઈએ એની તમને જાણ છે? એ બિઝનેસમાં દસ અમેરિકનોને તમે એ બિઝનેસમાં જે-જે કામો કરવાની જરૂરિયાત રહે તે-તે કામો કરવા માટે યોગ્ય અમેરિકનો મળી રહેશે? એમને બધાનો પગાર ચૂકવતા શું તમારો બિઝનેસ તમે એટલો સારો ચલાવી શકશો કે તમને નુકસાની નહીં જાય અને ફાયદો જ થશે?