વિઝા વિમર્શ,

યુએસએ વિઝા વિન્ડો

- ડો.સુધીર શાહ

અમેરિકામાં કોઈ ખાસ કારણસર, ફક્ત થોડા સમય માટે પ્રવેશવું હોય તો તમારે ‘નોન-ઇમિગ્રન્ટ’ શ્રેણીના, તમે જે કાર્ય માટે અમેરિકામાં ટૂંક સમય માટે જવા ઇચ્છતા હો, એ માટેના વિઝા મેળવવા પડશે. કાયમ રહેવા માટે ‘ઇમિગ્રન્ટ’ વિઝા મેળવવા પડશે.

આ લેખમાં તમને યુએસએના સર્વે પ્રકારના વિઝા વિશે સંક્ષિપ્તમાં અમેરિકાના વિઝા વિશેના લેખની બારી દ્વારા જાણકારી આપવામાં આવી છે.

ઇમિગ્રન્ટ વિઝા, જે મળેથી અમેરિકામાં દાખલ થયા બાદ ‘એલિયન રજિસ્ટ્રેશન રિસીપ્ટ', જેને આપણે 'ગ્રીનકાર્ડ' તરીકે ઓળખીએ છીએ એ આપવામાં આવે છે. ગ્રીનકાર્ડ મળેથી તમે અમેરિકામાં કાયમ રહી શકો છો. અમેરિકાની બહાર ઇચ્છો ત્યારે જઈ શકો છો. અમુક સંજોગોમાં પાંચ વર્ષ બાદ અને અમુક સંજોગોમાં ત્રણ વર્ષ બાદ અરજી કરીને નેચરલાઇઝેશનની પ્રક્રિયા દ્વારા અમેરિકન સિટીઝન બની શકો છો. એ માટે તમારે ઓછામાં ઓછો અડધો સમય એટલે કે અઢી કે દોઢ વર્ષ અમેરિકાની ધરતી ઉપર રહેવું જોઈએ અને લાગલગાટ એકસાથે ક્યારેય પણ છ મહિનાથી વધુ અમેરિકાની બહાર રહ્યા હોવું ન જોઈએ. અમેરિકાના સિટીઝન બનવાની અરજી કરો ત્યારે તમને અંગ્રેજી ભાષા આવડે છે, એ દર્શાવી આપવા માટે ટેસ્ટ આપવાની રહે છે. અમેરિકાનું સામાન્ય જ્ઞાન તમને છે એ માટે જનરલ નોલેજની ટેસ્ટ પણ આપવાની રહે છે. અમુક વયસ્કો માટે આ બે પરીક્ષામાંથી છૂટ પણ મળી શકે છે.