તમે અમને વોટ આપો, અમે તમને પૈસા સાથે પાયમાલી આપીશું

મફતની યોજનાનો અમલ કરનારાં રાજ્યો બરબાદીના માર્ગે ધકેલાઈ રહ્યાં છે, અનેક રાજ્યોમાં તેનાં આર્થિક દુષ્પરિણામો બહાર આવી રહ્યાં છે.

-  વિનોદ પંડ્યા

રાજનેતાઓ એવા જાતકો છે જે તમને મદદ કરવા માટે તમને જ લૂંટે છે. તેઓને સમજાઈ ગયું છે કે કરવેરા થકી લૂંટેલો માલ જનતાને પાછો વાળવાથી જનતા મત આપે છે અને ગાદીએ બેસાડે છે, પરંતુ આ ધંધામાં હમણાંનાં વરસોમાં સ્પર્ધાઓ એટલી વધી ગઈ છે કે તેઓ સરકારી ખજાનાની હાલત જાણ્યા કારવ્યા વગર જ મસમોટાં વચનો આપી દે છે. સ્થિતિ એવી છે કે નથી ખજાનો બચતો, નથી જનતાને આપેલાં વચનો પૂરાં થતાં અને જે જરૂરી કરવાનાં કામો હોય એ અધર લટકી જાય છે.