અવાજોનો ઓચ્છવ કરતા અતરંગી ASMR વીડિયો

*ઑટોનૉમસ સેન્સરી મેરિડિયન રિસ્પોન્સ (એએસએમઆર) આપમેળે ચરમસીમાએ પહોંચતી ઉત્તેજનાને પ્રેરનારી પ્રતિક્રિયા. આ સંજ્ઞાનો સૌથી વધુ ઉપયોગ થયો છે યુ-ટ્યૂબ પર. *૨૦૧૦માં જૅનિફર એલન નામની મહિલાએ સૌપ્રથમ આ ટર્મ કોઇન કરેલી. *ASMR વીડિયો અનેકોને કોઈ ને કોઈ પ્રકારે માનસિક રાહત આપવાનું કાર્ય કરે છે.

- સ્પર્શે હાર્દિક

'દેખ્યાનો દેશ ભલે લઈ લીધો, નાથ પણ કલરવની દુનિયા અમારી.' સદ્ગત કવિ ભાનુપ્રસાદ પંડ્યા પ્રજ્ઞાચક્ષુઓની કલરવની દુનિયાનો ઓચ્છવ કરતી આ પ્રચલિત પંક્તિઓ લખી ગયા. ધ્વનિનું પોતાનું અનોખું જગત હોય છે. પ્રજ્ઞાચક્ષુ ન હોય એ માણસ પણ આંખો બંધ કરીને શાંતિથી આસપાસના અવાજો સાંભળે તો એનો અનુભવ કરી શકે. સંગીતમય અવાજો હોય તો મજો મજો. એ સિવાયના લયમાં ચાલતા કલરવ સંભળાય તો પણ મધુર આનંદ મળે. કેવા અવાજોથી દિમાગમાં રસ ઝરશે એ વ્યક્તિ-વ્યક્તિની અંગત બાબત. ઠંડી ઋતુમાં મહત્તમ પંખાઓ કે એસી બંધ હોય ત્યારે દૂરના કે સાવ ધીમા અવાજો વધુ સ્પષ્ટ સંભળાશે. ક્યારેક લાંબા પાવરકટ પછી વીજળી પાછી આવે ત્યારે જીવાતી જિંદગીની બાયપ્રોડક્ટ જેવો ઘોંઘાટ સાંભળીને નિરાંત થાય. પંખીની ચિચિયારીઓ લગભગ તમામનાં મનને ભાવે. ઘરમાં કોઈ ઇલેક્ટ્રિક સાધન સતત ચાલતું હોય તો એના અવાજની પણ ટેવ પડી જતાં એનો લય સંતોષકારક લાગી શકે. ઝરણું તો ખેર સરળતાથી ક્યાં મળવાનું, પણ ફુવારા કે અન્ય ઉગમમાંથી એકધારું રેલાતું જળ આનંદ પ્રેરક બને. આસપાસ મંદિર હોય તો સતત વાગતા રહેતા ઘંટનો કર્ણપ્રિય રણકાર જીવનમાં વણાઈ જાય.