તમે અમને થેપલાં આપો અને અમે...

જેન્તીએ સેનાના વડાને ભોજન માટે નિમંત્ર્યા. પછી તો સમોસા, કચોરી, વડાપાંઉ જાતજાતની વાનગીઓ બનાવીને પીરસી. ઉપપ્રમુખને સેનાપતિની જીભ માથે સ્વાદનો એવો ચસ્કો લગાડ્યો કે બંને વિચારતા થઈ ગયા

ચંદ્ર ઉપર લોખંડના ભંડારો છે એવું વૈજ્ઞાનિકોએ જણાવ્યું અને દુનિયાની મહાસત્તાઓના મોઢામાંથી લાળના દદૂડા છૂટવા માંડ્યા. ચંદ્ર ઉપર રહેલું લોખંડ કોને મળે? પણ ચંદ્રની સરકારને એ માટે તૈયાર કરવી જોઈએ. ‘અમેરિકા ફર્સ્ટ’ એટલે અમેરિકાનું ગુપ્તચર ખાતું ચંદ્ર સાથે વાટાઘાટ કરે તેવા વિચક્ષણ માણસને શોધી કાઢવા મંડી પડ્યું. શોધતાં શોધતાં તેઓ ફૉર્ડ પાસે પહોંચ્યા. આ ફૉર્ડ એટલે મૂળ તો ગુજરાતના પરશુરામ. રાશિ ના બદલાય તેનું તેમણે ખાસ ધ્યાન રાખેલું. ગોર મહારાજે કહેલું કે, ‘આ છોકરા પાસે બુદ્ધિની ફરસી છે.' અને પરશુરામ એ સાચું માનતા હતા; કારણ કે તેમણે અમેરિકામાં મૉલનું સામ્રાજ્ય બુદ્ધિ વડે ઊભું કર્યું હતું. ફૉર્ડને કહ્યું,

‘તમે અમેરિકાના પ્રતિનિધિ તરીકે જાઓ અને ચંદ્ર ઉપરથી સસ્તા ભાવે લોખંડનો સોદો કરી આવો.' ફૉર્ડ કહે, ‘એવા ફાલતુ કામ માટે હું ધંધો છોડીને ના જાઉં, આ કામ તો મારો જ્યૉર્જ કરી આપશે.' જ્યૉર્જ એટલે મૂળ જેન્તી.

સીબીઆઈએ જેન્તીને ચકાસ્યો. ‘ઓહોહો, આ તો માણસ છે કે જિનિયસનું સ્ટ્રક્ચર!'

અમેરિકાએ ચંદ્ર સરકારને જાણ કરી, ‘તમારે ત્યાં પરમ શાંતિ છે. અમારે તો આય ર્વો બંધ થાતી જ નથી. તમારા લોકો બહુ સુખી હોય છે, એટલે તેનો અભ્યાસ કરવા અમે અમારા જ્યૉર્જને તમારે ત્યાં મોકલીએ છીએ. પૃથ્વીની મહાસત્તા ચંદ્રનો અભ્યાસ કરવા આવે, તેનાથી ચંદ્રની સરકાર ખુશ થઈ ગઈ.

અમેરિકન યાનમાં જેન્તી જવા તૈયાર થયો, ત્યારે તેને વળાવવા સંબંધીઓનાં ટોળાં ઊમટ્યાં. ચાર ચોપડી ભણેલી જેન્તીની વહુ લલી, પણ હવે લ્યુસી, તો ભાવથી ગદગદ થઈ ગઈ.

“સાંભળો, પાછા મૂઢે લગાવવાનો પાવડર હોય ને તો લેતા આવજો. 'ને ચીકણી માટીથી વાળ સારા થાય અને બળ્યું, શું કહેવાય? છોકરા માટે નવી ભાતનાં રમકડાં હોય એ લાવજો. પાછા ડૉલરના રૂપિયા ગણવા ના બેહતા.’