પ્રસૂન્ના પારેખ: કાંડાની કરામતથી મેળવ્યાં માન-સમ્માન

ઘરમાં રમતગમતમાં રસ પાંગરે એવું અનુકૂળ વાતાવરણ. અધૂરામાં પૂરું, ટેબલ ટેનિસની અમુક પ્લેયર્સ ઘરે રહેવા આવી. બસ, એ નાનકડી છોકરીના મનમાં પણ એ ખેલ વસી ગયો. એણે પ્રેક્ટિસ શરૂ કરી અને પહેલે ધડાકે રાજ્યસ્તરે જીતી પણ ખરી. પછી તો નામ મોટું થતું ગયું. આજે દીકરો કૉલેજમાં ભણે છે, પણ એમણે બૉલ-રેકેટની ગેમમાં દિલચસ્પી જાળવી રાખી છે અને નૅશનલ લેવલ પર ત્રણ-ત્રણ ગોલ્ડ મેડલ જીત્યા પછીય એ કહે છેઃ 'યે દિલ માંગે મોર!'

- મહેશ શાહ

રમતપ્રેમી પિતા અને કાબેલ ખેલાડી એવા મોટા ભાઈના પ્રોત્સાહનથી ૧૦-૧૧ વર્ષની છોકરી ટેબલ ટેનિસ રમવા માંડી ને પછી જોતજોતાંમાં અનેક ચંદ્રક જીતી લાવી. સ્કૂલ, કૉલેજ, યુનિવર્સિટી પછી રાષ્ટ્રીય અને આંતરરાષ્ટ્રીય સ્પર્ધામાં નામના મેળવનારી આ મહિલા ખેલાડી હવે નિયમિત વેટરન સ્પર્ધા રમે છે-જીતે પણ છે. સિનિયરોની રાષ્ટ્રીય સ્પર્ધામાં ત્રણ-ત્રણ ગોલ્ડ જીતનારાં ગુજરાતનાં એકમાત્ર મહિલા ખેલાડી પ્રસૂન્ના પારેખને હજી તો ઘણા મેડલ જીતવાના ઓરતા છે.

એક પરિવારનાં બધાં સંતાનો એક જ રમતના દાદુ ખેલાડી હોય એવું ઓછું જોવા મળે. ગુજરાતમાં જો કે એવા બે પરિવાર છે, જે ટેબલ ટેનિસમાં નિપુણ છે. રાજકોટના જામપરિવારના છ સભ્યો એક સમયે ટેબલ ટેનિસ રમતા. હવે સિકંદરભાઈ જામ સક્રિય છે તો ધ્રાંગધ્રાના દોશીપરિવારમાં ત્રણેય સભ્ય વર્તમાનમાં ટેબલ ટેનિસ સાથે સંકળાયેલા છે.

રેકેટ માટે પ્લાય અને રબરની પસંદગીમાં સ્પીડ, સ્પિન અને કન્ટ્રોલનું ખાસ ધ્યાન રાખવું પડે.

ધ્રાંગધ્રાવાસી રેખા અને ઋષિકેશ દોશીને ત્રણ સંતાનઃ ગૌરવ, પ્રસૂન્ના અને લાલન. રમતપ્રેમી ઋષિકેશ દોશી એક શાળામાં શિક્ષક બન્યા અને આચાર્ય તરીકે નિવૃત્ત થયા. એ ખો ખોમાં યુનિવર્સિટી ચૅમ્પિયન ટીમમાં હતા અને ટેબલ ટેનિસમાં ઈન્ટર યુનિવર્સિટી ચીફ રેફરી તરીકે પણ સેવા આપી.

૧૯૮૪ની વાત. ધ્રાંગધ્રામાં ટેબલ ટેનિસની ટુર્નામેન્ટ માટે વિવિધ શહેરોમાંથી છોકરીઓ આવી. એમનો ઉતારો ઋષિકેશ દોશીના ઘેર હતો. નાનકડી પ્રસૂન્નાએ ખેલાડી યુવતીઓ સાથે વાતો કરી અને એમની સ્પર્ધા જોવા પણ ગઈ. ત્યારથી એને ટેબલ ટેનિસ પ્રત્યે રસ જાગ્યો. પિતા અને ભાઈએ એ રસ સીંચ્યો. પ્રસૂન્ના શિશુકુંજ શાળામાં ભણે અને ત્યાં રોજ સવાર-સાંજ મહેન્દ્ર વ્યાસ અને મકવાણા સાહેબ પાસે ટેબલ ટેનિસ શીખે. જીવણભાઈ પાસે ફિટનેસની તાલીમ લે. ઘરમાં તો ત્રણેય ભાઈ-બહેન સતત પ્રેક્ટિસ કરતાં.

પ્રસૂન્ના અગિયાર વર્ષની ઉંમરે પહેલી વાર ગામબહાર ગાંધીનગર રમવા ગઈ. અન્ડર ૧૨ વયજૂથની સ્ટેટ ટુર્નામેન્ટમાં સીધી વિજેતા બની. પછી દિલ્હીમાં નૅશનલ ટુર્નામેન્ટમાં રમી.