એકસાથે અનેક ચમત્કારો સર્જતો મહોત્સવ!

આવતા અઠવાડિયાથી બીએપીએસના પાંચમા આધ્યાત્મિક વડા પ્રમુખસ્વામી મહારાજનો શતાબ્દી મહોત્સવ જ્યાં યોજાઈ રહ્યો છે એ અમદાવાદમાં છસ્સો એકરની ભૂમિ પર ખડા થયેલા અલૌકિક નગર અને એનાં વિવિધ આકર્ષણની સર્જનકથા પ્રેરણાદાયી સાથે જ ચમત્કારિક છે.

- કેતન મિસ્ત્રી (અમદાવાદ)

મહોત્સવસ્થળના હાર્દમાં રચાયેલો અનુપમ થિમેટિક ગ્લો ગાર્ડન

અમદાવાદના ચાંદખેડા વિસ્તારમાં રહેતા અ ૫૧ વર્ષી કિરણભાઈ એક ડૉક્ટરને ત્યાં ડ્રાઈવર તરીકે નોકરી કરે. એમણે પ્રમુખસ્વામી શતાબ્દી મહોત્સવમાં છ મહિનાની સેવા કરવી હતી. ડૉક્ટરે એમને છ મહિનાને બદલે એક મહિનો જવા કહ્યું, પણ કિરણભાઈ છ મહિનાની સેવા માટે મક્કમ હતા. ડૉક્ટરે એમને નાછૂટકે નોકરીમાંથી છૂટા કરવાનું કહ્યું તો કિરણભાઈ રાજી થઈ ગયાઃ હવે એક વર્ષ સેવામાં જઈ શકાશે અને એ ટ્રાન્સ્પોર્ટ-પાર્કિંગની સેવામાં લાગી ગયા. આ વાતની જાણ ઑસ્ટ્રેલિયામાં રહેતા એમના મિત્રને થઈ. એમણે કિરણભાઈની જાણબહાર છ મહિનાનો ઘરખર્ચ ઉપાડી લીધો, એમનાં બાળકોની ફી પણ ભરી દીધી..

ગુજરાત પોલીસખાતા (ક્રાઈમ)માં ઉચ્ચ પદે બિરાજતા પરેશભાઈ ચૌધરી સ્વૈચ્છિક નિવૃત્તિ લઈને ૧ જૂનથી પ્રમુખસ્વામી મહારાજ નગરનિર્માણમાં વિવિધ સેવામાં જોડાઈ ગયા. એ કહે છે: ‘બીજા હરિભક્તોનાં સમર્પણ જોઈને મને સેવા કરવાની પ્રેરણા થઈ.' પરેશભાઈ હાલ સિક્યોરિટી ડિપાર્ટમેન્ટમાં સેવા આપી રહ્યા છે..

મુંબઈના જાણીતા બિલ્ડર અજમેરાપરિવારના છોટુભાઈ અજમેરાના જમાઈ વિમલભાઈ નામાંકિત ઉદ્યોગપતિ છે. એમના બિઝનેસનો પથારો પુણેથી લઈને આફ્રિકા સુધી છે. આ વર્ષે વિમલભાઈ કામકાજ વધારવાની યોજના ઘડી રહ્યા હતા, પણ મહંતસ્વામીએ કહ્યું કે શક્ય હોય તો ૧ જુલાઈ, ૨૦૨૨થી સેવામાં જોડાઈ જાવ અને શતાબ્દીની પૂર્ણાહુતિ સુધી સેવા કરો. તરત વિમલભાઈ જ્ઞાનવત્સલદાસસ્વામી સાથે સેવામાં જોડાઈ ગયા. એમણે સાડા ત્રણ હજારથી વધુ ઉદ્યોગપતિઓ, વિવિધ કૉર્પોરેટ માંધાતાઓને રૂબરૂ મળી પ્રમુખસ્વામી મહારાજનું જીવન, એમનાં કાર્યો અને મહિમા સમજાવ્યાં.