જીન્સની તાણાતાણ

નવીનવેલી વહુના બ્યુટી પાર્લરમાં બ્યુટિફુલ બની સાસુમાને કરવું છે શું?

- સુષમા શેઠ

રવિવાર હોવાથી કોઈને ઊઠવાની ઉતાવળ નહોતી. નહોતી મુકેશભાઈને પોતાની દવાની દુકાન ખોલવાની તાણ. અમિત તો આમ પણ રવિવારે દસ વાગ્યા પછી ઊઠતો. આશીએ ઘરની બાજુમાં પોતાનું બ્યુટી પાર્લર શરૂ કરેલું. આજે એનેય ઉતાવળ નહોતી.

ફિગર મેઈન્ટેન રાખવા મથતી આશીએ રસોડામાં પ્રવેશતાંવેંત માઈક્રોવેવ અવનમાં પાણી ગરમ કર્યું, એમાં મધ, લીંબુ નિચોવ્યું અને આડુંઅવળું જોયા વગર ગટગટાવી ગઈ.

‘લે, એકલી એકલી પી ગઈ. એમ થાય કે સાસુ માટેય બનાવી આપું?’ ચા ઉકાળતાં ગીતાબહેન ગારોડિયા મનોમન ઊકળ્યાં.

ગીતાબહેનને થયું, નવી આવેલી વહુનું જ બ્યુટી પાર્લર છે માટે મન ફાવે ત્યારે બ્યુટિફુલ બની શકાશે ને મફતમાં જ મેકઅપ થઈ જશે. સુંદર દેખાવું દરેક નારીનો જન્મસિદ્ધ અધિકાર છે એવું દૃઢપણે માનતાં બેઠી દડીનાં ગીતાબહેનને નવા જમાનાની નવી વહુને જોઈને એકાએક મૉડર્ન થવાનો ધખારો ઊપડ્યો હતો.

‘આપણી જ દવાની દુકાન, બોલ. ફાકીઓ ખાધી, કાઢા પીધા, ટેબ્લેટો ગળી, પણ મારી ચરબી ન ઓગળી. તારા પપ્પાને ખાવાનો શોખ. મને બનાવવાનો. જરીક ચાખવા પૂરતું ખાઉં, બોલ.. પણ એકેય કારી કામ ન આવી. મનેય તારી જેમ સ્લિમ ઍન્ડ ટ્રિમ થાવું છે. પછી તો હુંય જીન્સ પે’રી શકું.’

‘ઓહહહ મમ્મીજી, તમે ઈંગ્લિશ સ્પીકિંગ ટ્રાય કરો છો તેમ જીન્સ પણ ટ્રાય કરો, યુ સી. અમેરિકામાં મોટા-નાના, જાડા-પાતળા બધા જ પે’રે. એમાં સ્લિમ ઍન્ડ ટ્રિમ થવાની જરૂર નહીં, ઈટ્સ ઓકે. આપણે આજે જ મૉલમાં જઈ તમારે માટે જીન્સ અને ટૉપ પર્ચેઝ કરી લાવીએ.’ એકની એક લાડકી વહુની વાત સાંભળી ગીતાબહેનને ગા-વા ઊપડ્યોઃ આજ મેં ઉપર, આસમાં નીચે.. ગીતાબહેન મૂડમાં હોય ત્યારે શરીરનો વા ઑટોમેટિક મટી જઈ એમને ગા-વા ઊપડતો.

‘સાસુ-વહુ ઉપર-નીચે પછી કરજો. પહેલાં કોઈ મને ચા આપો.’ બહારથી મુકેશભાઈનો ઘાંટો પડ્યો. નાક પર ટકેલી ચશ્માંની વાંકી દાંડી એમણે સીધી કરી. વાંકાચૂંકા અક્ષરો ઉકેલી શકતા મુકેશભાઈ પોતાની ધર્મપત્નીને ઉકેલી નહોતા શક્યા. આશી બાલ્કનીમાં યોગ કરવા બેઠી.

ગીતાબહેન ગીત ગણગણતાં ચા ઉકાળવા માંડ્યાં. કિટી પાર્ટીની સહેલીઓ મીના, રીટા, ચારુ સામે પોતે જીન્સ પહેરી વટ મારશે એવી કલ્પનામાં એ રાચ્યાં એમાં હરખઘેલી ચા ઊભરાઈ ગઈ.

‘મને ચા મળશે?' મુકેશભાઈએ ઢીલા અવાજે પૂછ્યું.