રાતનો આ રાજા તો પ્રજાનો શત્રુ છે!

આપણા શ્વાસમાં જતા આ જોખમથી તમે વાકેફ છો?

શહેરોમાં જીવવાની મજા તો રાતે જ આવે..

- નાઈટલાઈફ તો મુંબઈની જ...

આવું આપણે અનેક વાર બોલીએ છીએ અને બીજાના મોઢે સાંભળીએ પણ છીએ. એનું કારણ એ કે આપણાં શહેરો મોટા ભાગે રતજગી નગરીઓ એટલે કે આખી આખી રાત જાગતી રહેતી નગરીઓ બની ગઈ છે. અલબત્ત, આ જ રતજગાપણું સમગ્ર ભારત માટે જોખમની ઘંટડી વગાડી રહ્યું છે. તાજેતરના એક સંશોધનમાં કહ્યું છે કે ભારત અને ચીન નાઈટ્રેટ રેડિકલ્સનું મોટા પાયે ઉત્સર્જન કરનારા નાઈટ-ટાઈમ હૉટસ્પૉટ બની ગયાં છે. સાદી ભાષામાં રાતના સમયે ઉજાગરા કરીને આપણાં શહેરો વાયુપ્રદૂષણમાં જબરજસ્ત વધારો કરી રહ્યાં છે.

શું છે આ નાઈટ્રેટ રેડિકલ્સ?

હવામાં રહેલા અત્યંત સૂક્ષ્મ કણોને વિજ્ઞાનીઓ પાર્ટિક્યુલેટ મૅટર અથવા ફાઈન પાર્ટિકલ કહે છે. આ આ પાર્ટિક્યુલેટ મૅટર્સને સૂક્ષ્મતાના આધારે પીએમ૧૦ અને પીએમ૨.૫ એમ વર્ગીકૃત કરાયા છે. આ કણો અડધા માઈક્રોન (એક માઈક્રોન એટલે એક ઈંચનો ૨૫,૦૦૦મો ભાગ) કરતાં પણ નાના હોય છે.