ત્રણ પેઢીનું ત્રેખડ

એક ટંક માટેય રસોડું પુરુષોના હાથમાં જાય ત્યારે..

- સુષમા શેઠ

‘મમ્મીજી, વાય શુડ ઑલ્વેઝ વુમન કૂક?’

વહાલી સાસુને આશીએ તાર્કિક પ્રશ્ન પૂછ્યોઃ ‘સ્ત્રી જ શા માટે રોજ રસોઈ બનાવે?’

આગલી રાત્રે વાય શુડ મૅન સૅવ ઑલ ધ ફન નામનું પુસ્તક વાંચ્યા બાદ રવિવારે નિરાંતે ઊઠેલી આશીએ આમ તો ક્યારેય કૂકડાને બોલતો નહોતો સાંભળ્યો, પણ આજે રસોડામાં પગ મૂકતાંવેંત કર્કશ અવાજે કુકરે કૂક.. કરી મૂક્યું.

‘એટલે?’ ગડ ન પડતાં ગીતાબહેને સામે સવાલ પૂછ્યો.

‘વી નીડ ચેન્જ, ઓકે? તો આજે એવું કરીએ કે ઘરના પુરુષો રાંધે અને આપણે કોઈ મસ્ત કૉમેડી મૂવી જોઈએ.’

ભાવતું'તું અને વૈદે કીધું જેવો ઘાટ હતો. ‘આજકાલની છોકરીઓમાં હિંમત બહુ, કહેવું પડે.’ ગીતાબહેન હાથ લૂંછતાં રસોડા બહાર આવ્યાં.

‘હિયર હિયર. એક અનાઉન્સમેન્ટ કરવાની છે.’ આશી બોલી.

અમિતનો આળસ મરડતો હાથ અધ્ધર રહી ગયો, મુકેશભાઈએ સરી જતી ચશ્માંની દાંડી ઊંચી ચડાવી તો શાંતિલાલભાઈએ એક હાથે ટાઈ પસવારી અને બીજા હાથે વૉકિંગ સ્ટિક મજબૂત રીતે પકડી લીધી. અણધારી જાહેરાત કાને ધરવા સૌ અધીરા થયા.

‘આજે મમ્મીજી અને હં કિચનમાં એન્ટર નહીં થઈએ. તમારે ત્રણેએ મળીને લંચ કૂક કરવાનું.. અને સાંજે બધા રેસ્ટોરન્ટમાં જઈશું.. ઓકે? ઈન શૉર્ટ, અમને છુટ્ટી.’ છૂટથી બોલતી આશીને સાંભળી અમિતની આસપાસ બધું ગોળ ગોળ ફરવા માંડ્યું. મુકેશભાઈનાં ચશ્માં નવેસરથી નાક પર સરકી પડ્યાં અને શાંતિભાઈ ટાઈ વડે પરસેવો લૂંછવા માંડ્યા.

કશું જ ઓકે નહોતું. ધરણા કરવા બેઠાં હોય એમ સાસુ-વહુએ સોફા પર બેઠક જમાવી. ત્રણે પુરુષોએ અંદરોઅંદર મસલત કરીઃ ‘આ પડકાર ઝીલી લઈએ. એ બન્નેને બતાવી દઈએ, હમ ભી કુછ કમ નહીં.’

ત્રણેએ બહાદુરીપૂર્વક રસોડામાં પ્રસ્થાન કર્યું. સૌથી પહેલી સમસ્યા ત્યાં જ સામે આવીઃ ‘રાંધવું શું?’

‘ભજિયાં તો જોઈએ જ. ચણાના લોટના ખીરામાં બોળીને ડુંગળી અને બટાકાનાં પૈતાં તળવાનાં. સાવ સહેલું.’ શાંતિલાલ પોતાને ભાવતું બોલ્યા.

‘એનાથી કંઈ પેટ ન ભરાય, બાપુજી. સાથે પરાંઠા-શાક બનાવી દઈએ.’ મુકેશભાઈએ આઠ | મહિનાની ગર્ભવતી સ્ત્રીના પેટ જેવી પોતાની ફાંદ પર આંગળીથી તબલાં વગાડ્યાં.