કૉન્ક્રીટના જંગલમાં ખીલશે કળાનું કમળ

મુંબઈના બાન્દ્રા-કુર્લા કૉમ્પ્લેક્સની ગગનચુંબી બિઝનેસ ઈમારતો વચ્ચે શરૂ થયું છે વૈશ્વિક કક્ષાનું સાંસ્કૃતિક કેન્દ્ર.

- બિમલ મહેશ્વરી

નીતા મુકેશ અંબાણી કલ્ચરલ સેન્ટરની ઈમારત જેટલી ભવ્ય છે એટલું જ અફલાતૂન છે એનું ગ્રાન્ડ થિયેટર.

મુંબઈનું બાન્દ્રા-કુર્લા કૉમ્પ્લેક્સ એટલે આમ તો આખો કમર્શિયલ એરિયા. આવક વેરા વિભાગ સહિત થોકબંધ સરકારી કાર્યાલયો, અનેક બૅન્ક અને બીજી નાણાકીય સંસ્થાનોની કૉર્પોરેટ ઑફિસ તથા ભારત ડાયમંડ બુર્સ જેવા કરોડોની ઊથલપાથલ કરતા વેપાર-ઉદ્યોગો માટેનું કેન્દ્રબિંદુ.

આશરે ૩૭૦ હેક્ટરમાં ફેલાયેલા આ સંકુલમાં એમ તો એક મસમોટી હૉસ્પિટલ, વિશાળ એક્ઝિબિશન ગ્રાઉન્ડ, આલીશાન હોટેલ્સ અને રેસ્ટોરાં તથા બે ઈન્ટરનૅશનલ સ્કૂલ, અમેરિકન કૉન્સ્યુલેટ અને ડ્રાઈવ ઈન થિયેટર પણ છે. હવે આ બધાં વચ્ચે સંગીત, નૃત્ય, અભિનય સહિતની વિવિધ સાંસ્કૃતિક પરંપરાનું રખોપું કરે એવું એક કેન્દ્ર શરૂ થયું છે. એ છે નીતા મુકેશ અંબાણી કલ્ચરલ સેન્ટર.

ઉદ્યોગપતિ, રિલાયન્સ ગ્રુપના સર્વેસર્વા એવા મુકેશ અંબાણીનાં પત્ની નીતા અંબાણી શિક્ષણથી માંડી સ્વાસ્થ્યસેવા અને સ્પોર્ટ્સથી લઈ સમાજસેવા સહિત અનેક ક્ષેત્ર સાથે સંકળાયેલાં છે. એ પોતે એક ઉમદા નૃત્યાંગના છે અને સાંસ્કૃતિક પ્રવૃત્તિઓને એ ખાસ્સું પ્રોત્સાહન આપે છે. ભારતની વિવિધ કળાની એ જાળવણી માટે એમણે સેવેલું એક સપનું હવે સાકાર થયું છે.

ન્યૂ યોર્કના અતિ પ્રતિષ્ઠિત મેટ્રોપોલિટન મ્યુઝિયમ ઑફ આર્ટનાં માનદ ટ્રસ્ટી નીતા અંબાણીએ મુંબઈમાં એક અતિભવ્ય અને આધુનિક સાંસ્કૃતિક કેન્દ્ર તૈયાર કર્યું છે. એક રીતે કહીએ તો મુંબઈને એક નવું સાંસ્કૃતિક લૅન્ડમાર્ક મળ્યું છે. દેશમાં કળાને પ્રોત્સાહન આપતું વૈશ્વિક દરજ્જાનું આવું આ પહેલું જ સેન્ટર છે.

બાન્દ્રા-કુર્લા કૉમ્પ્લેક્સ (બીકેસી)માં જીયો વર્લ્ડ સેન્ટર તરીકે ઓળખાતું રિલાયન્સ ગ્રુપનું જ બિઝનેસ કન્વેન્શન સેન્ટર છે. દેશનું આ સૌથી મોટું કન્વેન્શન સેન્ટર છે. એ જ સંકુલમાં નીતા મુકેશ અંબાણી કલ્ચરલ સેન્ટરનું હમણાં ઉદ્ઘાટન થયું, જેમાં બોલીવૂડ, હોલીવૂડ, સ્પોર્ટ્સ, કળા અને અન્ય ક્ષેત્રની જાણીતી હસ્તીઓએ હાજરી આપી. આ ઉદ્ઘાટન સમારોહ જ ત્રણ દિવસ ચાલ્યો. ઉદ્ઘાટનના આગલા દિવસે, રામનવમીના અવસરે ત્યાં વિશેષ પૂજા પણ રાખવામાં આવી હતી.