પોટિંગ મિક્સને આમ કરો ફિક્સ..

ઘરે કમ્પોસ્ટ બનાવ્યું, નર્સરીમાંથી લાવેલા છોડ સાથે માટી આવી. હવે જાણી લો, કૂંડું ભરવાનું વિજ્ઞાન.

- પૂર્વી શાહ

કૂંડાનાં છિદ્રોને કાંકરાથી કવર કરવાં.

કૂંડા કે કન્ટેનર (પ્લાન્ટર)માં માટી ઉપરાંત બીજી ચીજો પણ ઉમેરવી પડે. આ મિશ્રણને બાગબાનીની ભાષામાં પોસ્ટિંગ મિક્સ કહે છે. એમાં કમ્પોસ્ટ, કોકોપીટ, રાખ અને નીમખલી જોઈશે. કમ્પોસ્ટ બનાવવાની કળા પાછલા અંકોમાં જણાવી દીધી. કોકોપીટ એ નાળિયેરનાં છોતરાં પર અમુક પ્રક્રિયા કરીને બનાવવામાં આવતું મટીરિયલ છે. છાણાં કે નાળિયેરનાં છોતરાં બાળીને મેળવવામાં આવેલી રાખ (અગ્નિહોત્ર યજ્ઞની રાખ પણ ચાલે) અને નીમખલી પણ આ મિક્સમાં ઉમેરવાની છે. નીમખલી એ લીંબોળીમાંથી બનાવવામાં આવે છે. ૧૦ કિલો પોટિંગ મિક્સમાં રાખ અને નીમખલી માત્ર એક-એક મુઠ્ઠી જ ઉમેરવાનાં છે. કોકોપીટ અને માટીનું પ્રમાણ વનસ્પતિના પ્રકાર પ્રમાણે વધતું-ઓછું કરવાનું છે. સપ્રમાણ પણ ઓકે.