કેમ જવાન દિલોની ધડકન એકાએક બંધ પડી જાય છે?

મોટાં મનના ભારતીયોનાં હૃદય જુવાનીમાં જ કેમ નબળાં પડતાં જાય છે? શીદને વધી રહ્યા છે ભારતીય યુવાનોમાં હાર્ટ અટેક?

- કેતન મિસ્ત્રી (મુંબઈ)

એનું નામઃ આદિત્યસિંહ રાજપૂત. વયઃ ૩૩ વર્ષ. વીસેક દિવસ પહેલાંની બપોરે અભિનેતા આદિત્ય ઘરનોકર-કમ-રસોઈયાને કંઈ જમવાનું બનાવવા કહે છે. બે-ચાર કોળિયા માંડ ભરે છે ત્યાં ઍસિડિટી, ઊલટી જેવું જણાતાં એ બાથરૂમમાં જાય છે ને ત્યાં ફસડાઈ પડે છે. નોકર એને તરત હૉસ્પિટલમાં લઈ જાય છે, જ્યાં એને મૃત જાહેર કરવામાં આવે છે. આના બેએક દિવસ બાદ જ મૂળ મુંબઈનાં, ૨૯ વર્ષી મિત્તલ ગડા ગોવાથી મુંબઈ આવવા ટૅક્સીમાં લગેજ ગોઠવી રહ્યાં હોય છે ત્યાં ચક્કર આવતાં ફસડાઈ પડે છે. ત્યાં ને ત્યાં એમના પ્રાણ જાય છે. મૃત્યુનું કારણ? હાર્ટ અટેક.

છેલ્લાં થોડાં વર્ષમાં બડે દિલવાળા ગણાતા હિંદુસ્તાનીઓનાં દિલ કમજોર પડતાં જાય છે ને અનેક કિસ્સામાં બંધ પડી જાય છે. ઈન્દર કુમાર (વયઃ ૪૩)થી લઈને ગાયક કેકે (૫૩) અને મંદિરા બેદીના હસબન્ડ રાજ કૌશલ (૫૦)થી લઈને કપૂર ખાનદાનના ભૂતપૂર્વ ઍક્ટર-ડિરેક્ટર રાજીવ કપૂર (૫૭), સિદ્ધાર્થ શુક્લા, કન્નડ સુપરસ્ટાર પુનિત કુમાર (૪૫), કૉમેડિયન રાજુ શ્રીવાસ્તવ, હજી બે મહિના પહેલાં જ અભિનેતા-દિગ્દર્શક સતીશ કૌશિક તો, ૨ જૂને ૩૯ વર્ષના જાણીતા કન્નડ ઍક્ટર નીતિન ગોપીને મળસકે હૃદય પર પ્રચંડ હુમલો આવતાં બેંગલુરુના એના ઘરેથી નજીકની હૉસ્પિટલે લઈ જવામાં આવ્યો, પણ ડૉક્ટરો એને બચાવી ન શક્યા.

હવે જરા આ આંકડા જુઓઃ ગયા વર્ષે એટલે કે ૨૦૨૨માં રોજના આશરે ૨૬ જીવનદીપ હાર્ટ અટેકથી બુઝાયા, જ્યારે કૅન્સરથી પચ્ચીસ. આમાંય ચિંતાજનક વાત એ છે કે વધુ ને વધુ યુવાનો હાર્ટ અટેકનો ભોગ બની રહ્યા છે. શહેરીકરણની કિંમત  આપણે આ રીતે ચૂકવી રહ્યા છીએ. ચાલવાનું સાવ ઓછું થઈ ગયું છે, લોકો ઘરની બહાર નીકળે તો છે, પણ એસી કારમાં, બહારની ખાણી-પીણીનો અતિરેક થઈ રહ્યો છે. એ પણ રેસ્ટોરાંમાં જવાને બદલે ઘેરબેઠાં મગાવી લેવામાં આવે છે. ઈન ફૅક્ટ, મોટા ભાગની જીવનજરૂરિયાત આજે ઈન્ટરનેટ પૂરી કરી દે છે એટલે લોકો ચાલવાના ચોર થઈ ગયા છે.

મુંબઈના સિનિયર કન્સલ્ટન્ટ હાર્ટ સર્જ્યન ડૉ. પવન કુમાર ચિત્રલેખાને કહે છે: ‘છેલ્લાં આઠ-દસ વર્ષથી હું જેટલી બાયપાસ સર્જરી કરું છું એમાં પિસ્તાલીસથી નીચેની વયના દરદી વધતા જાય છે. એક સમય હતો, જ્યારે સાઠ પછી હાર્ટ અટેક આવતા. ત્યાર બાદ પચાસ પછી અને હવે ચાલીસી વટાવનારાઓમાં હાર્ટની સમસ્યા કૉમન થઈ ગઈ છે. ટૂંકમાં, એજ પ્રોફાઈલ ધરમૂળથી બદલાઈ રહ્યા છે.’