નિવૃત્તિ પછીની જિંદગી માટે શું છે તમારા પ્લાન?

સરકાર ‘નૅશનલ પેન્શન સ્કીમ’ અને ‘અટલ પેન્શન યોજના’ને પ્રોત્સાહન આપી રહી છે અને તમને પણ એમાં રોકાણ કરવામાં રસ હોવો જોઈએ. શા માટે? એનાં કારણ સમજીએ.

- જયેશ ચિતલિયા

આપણે ગયા સપ્તાહે આ કૉલમમાં કેટલીક લઘુ બચત યોજના વિશે વાત કરી હતી. આ વખતે આપણે નિવૃત્તિ બાદ વરિષ્ઠોનો ટેકણલાકડી કે આધાર બની રહેતી સ્કીમની વાત કરવી છે. આ સ્કીમ બચત અને રોકાણ બન્ને માટે છે. એક છે, એનપીએસ એટલે કે નૅશનલ પેન્શન સ્કીમ.

અહીં પેન્શન શબ્દ વાંચીને એ માત્ર સરકારી કર્મચારીઓ માટેની કે ધનિક અથવા ઊંચી આવક ધરાવતા લોકો માટેની જ યોજના છે એવું માની લેવાની ભૂલ કરશો નહીં. આ યોજનાનો લાભ સામાન્યમાં સામાન્ય માનવી પણ લઈ શકે છે. શાકભાજી સહિત વિવિધ ચીજવસ્તુ વેચનારા ફેરિયા, રિક્ષા-ટૅક્સી ડ્રાઈવર, પ્યુન, ઘરનોકર, વગેરે જેવા વર્ગ પણ આ સ્કીમમાં ભાગ લઈ શકે છે. આમ તો આ વાત હવે જાહેર છે. તેમ છતાં એક રિમાઈન્ડર તરીકે આ વાત અહીં દોહરાવી છે.

અનેક વરિષ્ઠ નાગરિકો એમના માટેની સિનિયર સિટિઝન સેવિંગ સ્કીમનો લાભ લઈ રહ્યા હોવાથી આ યોજનામાં ભરપૂર નાણાપ્રવાહ આવી રહ્યો છે એમ એનપીએસમાં પણ મોટા પ્રમાણમાં રોકાણ આવી રહ્યું છે. અત્યારે આ સ્કીમ ખાનગી કર્મચારીઓ સહિત દરેક વર્ગમાં લોકપ્રિય જાય છે. લોકો આને નિવૃત્તિ ભંડોળ તરીકે જોતાં થયા છે. આ સાથે ગરીબ-સામાન્ય વર્ગ માટે એપીવાય (અટલ પેન્શન યોજના) પણ ચાલી જ રહી છે એ પણ નોંધવું રહ્યું.

કોવિડ દરમિયાન અને એ પછી એનપીએસનું મહત્ત્વ ખૂબ વધતું રહ્યું છે. જેમણે પણ પોતાના પરિવારના આધાર સમાન પ્રિયજન ગુમાવ્યા છે એમની માટે આ ફંડનું મહત્ત્વ ખૂબ વધી ગયું છે.