દેશમાં સંશોધન ક્ષેત્રની થશે કાયાપલટ

‘નૅશનલ રિસર્ચ ફાઉન્ડેશન’ની સ્થાપના સાથે હવે ઘરઆંગણે રિસર્ચ માટે સર્જાશે અનુકૂળ માહોલ.

વર્ષ ૨૦૨૦ની નવી શિક્ષણનીતિમાં અનેક મહત્ત્વપૂર્ણ સૂચન હતાં, એમાંનું એક હતુંઃ નૅશનલ રિસર્ચ ફાઉન્ડેશન (એનઆરએફ)ની સ્થાપના. એ દિશામાં સક્રિય કામગીરીની હવે શરૂઆત થઈ ગઈ છે. હમણાં કેન્દ્ર સરકારે આ ફાઉન્ડેશનની સ્થાપના માટેનો ખરડો સંસદમાં રજૂ કરવાની મંજૂરી આપી દીધી છે.

એનઆરએફ જેવી સંસ્થાની સ્થાપના, રિસર્ચ ગ્રાન્ટના બજેટમાં વધારો અને સંશોધન ક્ષેત્રને સુવ્યવસ્થિત કરવાની માગણી ભારતમાં ઘણા સમયથી ચાલી રહી હતી, જેને હવે નક્કર રૂપ મળી રહ્યું છે.

આ ફાઉન્ડેશનનું કામ સંશોધકો, સરકારી સંસ્થાનો અને ઉદ્યોગજગત વચ્ચે એક સંયોજક-કૉર્ડિનેટરની ભૂમિકા ભજવવાનું હશે. એની સ્થાપનાને કારણે હવે સંશોધન કેન્દ્રો અને વિવિધ ઈન્ડસ્ટ્રી વચ્ચે સક્રિય જોડાણ થશે, જેનાથી વ્યવહારજીવનમાં, જુદા જુદા ઉદ્યોગોમાં ક્યાં અને કયા વિષય પર સંશોધનની જરૂર છે એની માહિતી સીધી સંશોધકો, યુનિવર્સિટી, સંસ્થાનોને મળશે અને સમસ્યાની જરૂર પ્રમાણે સંશોધન હાથ ધરી શકાશે. ટૂંકમાં, પૉલિસી અને પ્રેક્ટિસમાં લાવી શકાય એવા પ્રોબ્લેમ સોલ્ડિંગ રિસર્ચનું પ્રમાણ વધારવામાં આવશે.