તેજસ્વી તારલા કેમ એકાએક ખરી પડે છે?

આ વર્ષે સિત્તેર જેટલી સ્ટાર્ટ-અપ કંપનીએ સત્તર હજારથી વધુ કર્મચારીને છૂટા કર્યા, જેમાં ખાસ તો ઈન્ટરનેટ પર ચીજવસ્તુઓ વેચતી કંપનીઓ છે. શું છે કારણ આમ ધમધોકાર ચાલતા વેપારધંધા ઠપ થઈ જવાનું?

-  કેતન મિસ્ત્રી (મુંબઈ)

એમનું નામઃ વીરપ્પા ગંગૈય્યા સિદ્ધાર્થ હેગડે. ૧૯૯૬માં એમણે બેંગલુરુમાં એક કૉફી શૉપ ખોલી. ૨૦૧૯માં દેશનાં અઢીસો શહેરમાં એમની ૧૮૦૦ જેટલી કૉફી શૉપ હતી, દેશમાં એમણે એક નવીનવાઈનું કૉફી કલ્ચર સર્યું. એમની કૉફી શૉપનું સૂત્ર હતું: અ લૉટ કૅન હૅપન ઓવર કૉફી અને ખરેખર.. કૉફીના કપમાં વસંત નહીં, પણ વા-વંટોળ આવ્યું: ૩૧ જુલાઈ, ૨૦૧૯ની વહેલી સવારે મેંગલોર નજીક આવેલા ઉલ્લાલ શહેરની નેત્રાવતી નદીના કાંઠે કાફે કૉફી ડે (સીસીડી)ના સ્થાપક, ૫૯ વર્ષી વી.જી. સિદ્ધાર્થનો મૃતદેહ મળી આવ્યો. છેલ્લા ૩૬ કલાકથી પોલીસટીમ ગુમશુદા સિદ્ધાર્થને શોધી રહી હતી.

આત્મહત્યા કરતાં પહેલાં સિદ્ધાર્થ એક લાંબા પત્રમાં જણાવેલું કે આન્ત્રપ્રેન્યૉર તરીકે હું નિષ્ફળ ગયો. આ બધા માટે હું, મારા અમુક ખોટા નિર્ણયો જવાબદાર છે. બહુ ટેક્નિકલ વિગતોમાં ન પડીએ, પણ સિદ્ધાર્થની અડધોઅડધ કમાણી કૉફી બિઝનેસ (કૉફી પ્લાન્ટેશન, કાફે તથા એક્સપોર્ટ)માંથી આવતી. નિષ્ણાતોને નવાઈ લાગતી કે કૉફી બિઝનેસમાં પ્રવૃત્ત સિદ્ધાર્થે શા માટે કન્સ્ટ્રક્શન, લૉજિસ્ટિક્સ, ફાઈનાન્સિયલ સર્વિસીસ તથા ઈન્ફોર્મેશન ટેક્નોલૉજી જેવા ધંધામાં પડવું જોઈએ. આ સાવ વિચિત્ર કહેવાય એવાં વૈવિધ્યકરણ હતાં. આમાંના મોટા ભાગના ધંધા ખોટમાં ચાલતા. એટલું જ નહીં, પણ મૂડીનું ધોવાણ થતું રહેતું. શુદ્ધ ગુજરાતીમાં કહે છે એમ, ગજાબહારનો વેપલો કરવામાં માટી ચારે કોરથી મૂંઝાણો હતો.

ગયા અઠવાડિયે (બીજી ઓગસ્ટ) હિંદી સિનેમાના અવ્વલ દરજ્જાના પ્રોડક્શન ડિઝાઈનર ૫૭ વર્ષી નીતિન ચંદ્રકાંત દેસાઈનો મૃતદેહ એમના એનડી ફિલ્મ સ્ટુડિયોમાંથી મળી આવ્યો. પોલીસતપાસમાં એવું બહાર આવ્યું કે એમણે ગળેફાંસો ખાઈને જીવન ટૂંકાવ્યું. તપાસમાં એવું પણ બહાર આવ્યું કે એમના માથે આશરે ૧૦૦ કરોડ રૂપિયાનું કરજ હતું. શુક્રવારે (૪ ઓગસ્ટે) એમના જ સ્ટુડિયોમાં (જોધા અકબરવાળા) દરબારના ભવ્ય સેટ નજીક નીતિન દેસાઈના અંતિમસંસ્કાર થયા.