કોમલ ભટ્ટ: સબ સુખ લહૈ તુમ્હારી સરના, તુમ રક્ષક કાહૂ કો ડરના

‘રામ સિયા રામ, સિયા રામ જય જય રામ..’ એક બાજુ હમણાં સાળંગપુરમાં કેટલાંક ભીંતચિત્રોને કારણે વિવાદ ચાલી રહ્યો હતો ત્યારે એક મહિલા પોતાના ગ્રુપ સાથે સુદરકાંડના પાઠનું પઠન કરી રહી હતી. ત્યાંથી જે પણ પસાર થાય એ ઘડીક વિચારમાં પડતા કે સુંદરકાંડના પાઠ અને એ પણ સ્ત્રી દ્વારા? - તો ચાલો, જાણીએ કહાણી એ મહિલાની જે ૩૬૫ દિવસ સુદરકાંડના પાઠ કરે છે.

- હેતલ રાવ

તું આ શું બોલી રહી છે? તને ખબર છે કે આ કામ તારાથી ન થાય? ભગવાન ક્રોધે ભરાશે..

- અરે, જરા તો વિચાર કર. આપણે બેરું જાત અને હનુમાન દાદાના સુંદરકાંડના પાઠ કરવાની વાત કરે છે તું? અને એ પણ જાહેરમાં, બધાના ઘરે જઈ જઈને?

- આમને સમજાવો કો’ક, આ બાયડીઓ તો ગાંડી થઈ છે..

આ શબ્દો સમાજની એવી મહિલાઓના છે, જે એમ માને છે કે હનુમાન દાદા પર માત્ર ને માત્ર પુરુષોનો જ કૉપીરાઈટ છે. દાદાની ભક્તિ કરવી, દાદાનો શૃંગાર કરવો કે પછી દાદા માટે સુંદરકાંડનો પાઠ કરવો એ કામ પુરુષ જ કરી શકે, કોઈ સ્ત્રી નહીં. જો કે આ વાત એક મહિલાને અમાન્ય હતી. એણે તો પોતાનું સમગ્ર જીવન જ દાદાના ચરણે ધરી દીધું હતું. હનુમાનજી પરની અપાર શ્રદ્ધાને સહારે જ એણે તો બીજા લોકો શું કહે છે-શું વિચારે છે એની પળોજણમાં પડ્યા વગર પોતાની મહિલા મિત્રો સાથે મળીને એણે સુંદરકાંડના પાઠ કરવાનું શરૂ કર્યું. આ મહિલા એટલે કોમલ ભટ્ટ.

મૂળ ખંભાતના મુકેશભાઈ મહાદેવના ભક્ત. એમની નાની દીકરી કોમલ ભણવામાં હોશિયાર. ઘરમાં ભક્તિનું વાતાવરણ અને એ માહોલમાં ઊછરેલી કોમલ માતા ઉષાબહેનને કહેતી પણ ખરી કે ‘હું સાધ્વી બનીને સમગ્ર દેશમાં રામકથા કરીશ. વિશ્વફલક પર પ્રભુ શ્રી રામનું અને હનુમાન દાદાના નામનું રટણ થાય એવું કામ કરીશ.’ 

થયું પણ એવું જ, પરંતુ જરા અલગ રીતે. બાર ધોરણ સુધી અભ્યાસ કર્યા પછી કોમલે ભણવાનું અધૂરું છોડ્યું અને દાદાની ભક્તિમાં લીન થયાં. થોડાં વર્ષ પછી આણંદમાં રહેતા દીપકભાઈ ભટ્ટ સાથે એમનાં લગ્ન થયાં. આંખોમાં શમણાં અને મનમાં દાદાના નામનું ભાથું બાંધી. કોમલબહેન સાસરે આવ્યાં. દીપકભાઈ સેલ્સ ટૅક્સ-ઈન્કમ ટૅક્સ સહિતનું એકાઉન્ટ્સનું કામ કરતા. જીવનમાં સંઘર્ષ હતો, પણ બન્ને એનો સામનો કરી સ્થિતિ સાચવી લેતાં હતાં, પણ સમયનું ચક્ર બદલાયું અને..