પ્રકાશના પર્વ નિમિત્તે ઘરને બનાવો નવું-ચકાચક

દિવાળી હોય કે બીજો તહેવાર, બધી વસ્તુ નવી લેવાની ન હોય, જે છે એને જ ઘરેલુ ઉપચારથી ચમકાવી દો.

દિવાળીના તહેવાર પહેલાં લગભગ દરેક ઘરમાં સફાઈનો તબક્કો શરૂ થઈ જાય છે. ઘણા લોકો ઘરમાંથી જૂની વસ્તુ કાઢીને નવી ચીજ લાવે છે. જો કે કેટલીક વસ્તુ ! એવી હોય છે જે દરેક વખતે બદલી શકાતી નથી. આવી વસ્તુને ડીપ ક્લીન કરવું વધુ જરૂરી બની જાય છે. વાસ્તવમાં બજારમાં ઘણાં સફાઈસાધન અને મટીરિયલ મળશે, જેની કિંમત વધુ હોય અને ૧૦૦ ટકા સફાઈનો દાવો કર્યા પછી પણ એની ધારી અસર જોવા ન મળે. એને બદલે ગૃહિણી ઘરમાં હોય એવી સામગ્રીની મદદથી ઘરને ચમકાવી શકે છે.

બેકિંગ સોડા પણ આવો જ એક સફાઈ એજન્ટ છે. ચાલો, તમને જણાવીએ બેકિંગ સોડા ઉપરાંત વિનેગર, કોપરેલ તેલ, લીંબુના રસ, વગેરેથી કેવી રીતે આપણે ઘરને ચકાચક કરી શકીએ...

સિન્કમાં આપણે રસોઈનાં વાસણો ઉપરાંત એઠી થાળી, વાટકા, વગેરે સાફ કરીએ છીએ, જેને કારણે વાસણોમાં રહેલું ઘી અને તેલની ચીકણાશ સિન્કમાં જમા થઈ જાય છે. સામાન્ય સાબુથી ધોવાથી સિન્ક સંપૂર્ણપણે સાફ થતી નથી. એના માટે ખાવાના સોડામાં લીંબુનો રસ ઉમેરીને સિન્ક સાફ કરો પરિણામ જુઓ.

બેકિંગ સોડાની મદદથી કાર્પેટ પર જામેલી ધૂળને સરળતાથી દૂર કરી શકાય છે. ઘણી વખત કાર્પેટને ડિટર્જન્ટથી સાફ કરવાથી એની ચમક ગાયબ થઈ જાય છે. કાર્પેટને નવા જેવી ચમકાવવા માટે એના પર ડિટર્જન્ટને બદલે ખાવાનો સોડા છાંટી ૩૦ મિનિટ પછી સ્ક્રબ કરી પાણીથી સાફ કરવાથી એ ચમકી ઊઠશે.