ડોફોળ

ટૂંકો છતાં મધુરો એ સાથ તમે સહેજ પણ ભૂલ્યા નથી. કોણ જાણે ક્યા સંજોગોને કારણે એ બીજે પરણીને છતી રહી ને કોઈની પત્ની બની ગઈ. વખત છતાં તમે પણ સંગીતાના ‘પતિ’ બની ગયા. પ્રેમી મટીને બીજી કોઈ સ્ત્રીના પતિ બનવું કેટલું કપરું છે ને તમારાથી વિશેષ તો કોણ જાણતું-સમતું હો... હો, મિસ્ટર મેહુલ!

- અજય ઓઝા

છેલ્લા એક સપ્તાહથી તમારા દિમાગમાં એક નવું નામ ચકરાઈ રહ્યું છે, મેહુલ. નામ નવું તો કેમ કહી શકાય? તમારો મોબાઈલ ભલે એને અનનોન બતાવે, પણ જે નંબર પરથી એ મેસેજ આવેલો છે એ નંબર તમારી અંદર તો પચ્ચીસ-પચ્ચીસ વર્ષોથી કોતરાયેલો પડ્યો છે કે નહીં? જાણો છો ને એ નંબરને એના દસેદસ અંકોથી? કહો મેહુલ, તો આ સ્મિતા, એ કંઈ અજાણ્યું નામ તો નથી જ ને તમારા માટે? પચ્ચીસ વર્ષ જૂનું કહો, હા... એ પચ્ચીસ વર્ષ જૂનું નામ તમારા દિમાગમાં ચકરાઈ રહ્યું છે. છેલ્લા એક સપ્તાહથી એટલા માટે કે ગયા સોમવારે એનો મેસેજ આવેલો અને આજે શનિવાર આવી પણ ગયો.

સ્મિતા એટલે એક જમાનાની તમારી સિલ્ક સ્મિતા જ તો વળી! ને આમ પણ તમે તો એને એ જમાનામાં પણ સિલ્ક કહીને જ બોલાવતા. એ હતી પણ એવી જ, બિલકુલ રેશમી અને ચુલબુલી... અને તમારી પાછળ પાગલ પણ એટલી જ. એને યાદ કરવા માટે તમારે પચ્ચીસ વર્ષ જૂની ધૂળ ખંખેરવી પણ ના પડે એટલી નજીક રહી છે એ તમારાથી. ટૂંકો, છતાં મધુરો એ સાથ તમે સહેજ પણ ભૂલ્યા નથી. કોણ જાણે કયા સંજોગોને કારણે એ બીજે પરણીને જતી રહી ને કોઈની પત્ની બની ગઈ. વખત જતાં તમે પણ સંગીતાના પતિ બની ગયા. એ સમયે તો બધું બહુ દુષ્કર લાગેલું તમને, નહીં મેહુલ? પ્રેમી મટીને બીજી કોઈ સ્ત્રીના પતિ બનવું કેટલું કપરું છે એ તમારાથી વિશેષ તો કોણ જાણતું-સમજતું હશે... કહો, મિસ્ટર મેહુલ! પણ અસલમાં જોવા જેવી વાત એમ બની છે કે વીતેલા આ અઢી દાયકામાં એક પણ વાર તમને યાદ ન કરનારી તમારી એ સિલ્ક સ્મિતાના નંબર પરથી ગયા સોમવારે જ એક ખાસંખાસ ગુડ ન્યૂઝ એટલે કે સુંદર મેસેજ આવ્યો છે, જે જોયા પછી તમે ફરી એક વખત પતિ મટીને પ્રેમી બની રહ્યા છો, મેહુલ. ખરું ને? 

લુચ્ચ્ચી... સોમવારે મેસેજ કરીને શનિવારે બોલાવે છે. આખું અઠવાડિયું કેમ કરીને કાઢી શકાશે?

સોમવારે અચાનક જ તમારા મોબાઈલમાં સ્મિતાના નંબર પરથી મેસેજ આવ્યોઃ એય ડફોળ, મજામાં કે નહીં? જો સાંભળ, મારા પતિની અહીં બદલી થઈ છે. નસીબદાર સમજ કે હું ફરી તને મળી છું, સેટરડે ફ્રી છું, મળવા આવ. ઍડ્રેસ મોકલું છું.

વાંચીને તમારા શરીરમાં કેટલાય પ્રકારની ધ્રુજારી આવી ગઈ. લાડમાં એ તમને હંમેશાં ડફોળ જ કહેતી એ તમને બરાબર યાદ હતું.