પેલ્વિક ઑર્ગન પ્રોલેપ્સ વિષે આટલું જાણો...

ઘણી સ્ત્રીને આ ‘પીઓપી’ની સમસ્યા સતાવે છે, પણ એના વિશે બોલતું કોઈ નથી, કારણ કે...

- ડૉ. અર્ચના પારસ શાહ

માયાની સ્થિતિ બીજી સ્ત્રી જેવી જ છે. વર્ષો સુધી એ વારે ઘડીએ પેશાબ લાગવાની સમસ્યાને ચુપચાપ સહન કરતી રહી. બહાર જવાનું હોય ત્યારે એણે સૌથી પહેલાં પાણી, ચા કે છાશ પીવાનું ક્યારે બંધ કરવું એ ઠેરવી લેવું પડે. બાથરૂમમાં જવાની ચિંતાને ધ્યાનમાં રાખીને જ એણે પોતાના દિવસનું આયોજન કરવું પડતું. લાંબો સમય સુધી સહન કરવાને કારણે એની હાલત બગડી અને ધીમે ધીમે એણે યોનિમાં દબાણ અને સોજો અનુભવવાનું શરૂ કર્યું. પેશાબ જવાની તીવ્ર ઈચ્છા અને દબાણની લાગણી હવે પેશાબ કરવાની અસમર્થતા અને અવરોધને કારણે જટિલ બનતાં એને પેશાબની નળીઓમાં ચેપ લાગ્યો હતો.

આ સમસ્યાથી કંટાળેલી માયા છેવટે ગાયનેકોલૉજિસ્ટ પાસે પહોંચી.  તપાસમાં જાણવા મળ્યું કે માયાને વજાઈનલ પ્રોલેપ્સની તકલીફ છે. પેલ્વિક ઑર્ગન પ્રોલેપ્સ (પીઓપી) વિશે સ્ત્રીઓમાં બહુ ચર્ચા થતી નથી. સ્ત્રી ઘણી વાર આવી સ્થિતિ કે એની સારવાર વિશે બોલવામાં પણ મૂંઝવણ અનુભવે છે. ઘણી સ્ત્રી એવી છે કે એમણે ક્યારેય આ વ્યાધિ વિશે સાંભળ્યું પણ નથી હોતું. હકીકત એ છે કે તમામ ઉંમરની આશરે એક તૃતીયાંશ મહિલા એમના જીવનના અમુક તબક્કે આ સ્થિતિનો અનુભવ કરે છે.

વજાઈનલ પ્રોલેપ્સ શું છે?