જન્મતાંની સાથે દેખાડ્યો સંગીતનો જાદુ

ડૉક્ટર-એન્જિનિયર બનવાને બદલે એણે સૂર-તાલની સંગાથે કારકિર્દી ઘડવાનું પસંદ કર્યું. આજે એને જ સથવારે અમદાવાદની આ યુવતી મનોરંજન ક્ષેત્રે કાઠું કાઢી રહી છે.

- હેતલ રાવ

દીકરીનો રડવાનો અવાજ સાંભળી અમિતભાઈ શાહે એને હાથમાં લેતાં કહ્યું કે મારા ઘરે તો સાક્ષાત્ મા સરસ્વતી પધાર્યા છે... ત્યારે હૉસ્પિટલમાં આસપાસ ઊભેલા લોકો એ અમને  ટપાર્યાઃ ‘ભાઈ, દીકરી આવે તો લક્ષ્મીનો અવતાર કહેવાય.' ત્યારે મલક મલક મરકતાં અમિતભાઈ બોલ્યાઃ ‘મારી દીકરી સૂરમાં રડી એટલે મારે મન તો એ સરસ્વતી જ છે.’

એ દીકરી ખરેખર સરસ્વતી જ નીકળી. ભણવામાં હોશિયાર અને સૂર તો જાણે ગળે ને ગળે જ. એનું નામ દેવાંશી શાહ. વતન અમદાવાદ. અનેક ફિલ્મી ગીત, ઍડ્વર્ટાઈઝમેન્ટ અને પ્રાઈવેટ આલબમને અવાજ આપ્યો છે એણે. વડાપ્રધાન નરેન્દ્ર મોદીની ગુજરાતની મુલાકાત દરમિયાન અનેક કાર્યક્રમમાં દેવાંશીએ ગુજરાતી ગીત અને શ્લોકગાન રજૂ કર્યાં છે તો હમણાં ઈન્ડિયન પ્રીમિયર લીગ (આઈપીએલ)ની એક મૅચમાં અમદાવાદમાં સ્ટૅડિયમમાં પણ એણે પોતાના અવાજનો જાદુ પાથર્યો. દૂરદેશાવર રહેતાં ભારતીય બાળકોને એ ઑનલાઈન સંગીત શીખવે છે તો મ્યુઝિક થેરાપીની જરૂર હોય એવા દરદીઓને સારવાર આપવાનું કામ પણ એ કરે છે.

પિતા ગુજરાતી, માતા સુષમા મરાઠીભાષી. અમદાવાદમાં રહેતાં આ દંપતીનું દેવાંશી એ એકમાત્ર સંતાન. સ્વભાવે શાંત અને શરમાળ દેવાંશી બાળપણથી જ સંગીતના સૂર સાથે રમતી. સુરીલો અવાજ એ ભગવાને એને આપેલી મહામૂલી ભેટ. શાળામાં બીજાં બાળકો ફ્રી લેક્ચરમાં મસ્તી કરે ત્યારે એ એક બાજુ બેસીને સાત સૂરોનું જ્ઞાન મેળવવાનો પ્રયાસ કરે. દેવાંશી નાની હતી ત્યારે ડ્રોઈંગ, નૃત્ય, સંગીત જેવી જુદી જુદી ઍક્ટિવિટી શીખવા જતી. જો કે સંગીતમાં એને વધુ રુચિ. પિતાએ દીકરીની કળાને ઓળખી લીધી. એમણે નક્કી કર્યું કે હવે મારી દીકરી સંગીતની સંપૂર્ણ તાલીમ મેળવશે... અને એમ શરૂ થઈ દેવાંશીની સંગીતયાત્રા.