સંતાન હોવાં જોઈએ કે નહીં?

દિવસો એને ઘણાય અમૂલા દીધા અમે એનાથી દૂર એક ઘડી ના રહ્યા અમે સંતાન ના હોવાની પીડા એટલી ગમી સંતાનની જ જેમ ઉછેરી પીડા અમે.

- હિતેન આનંદપરા

જન્મ ઈશ્વરદત્ત છે. મોટા ભાગે વિશેષ પ્રયાસ વગર સહજતાથી પારણું બંધાય, પણ કેટલાય કિસ્સામાં અનેક વર્ષોની પ્રતીક્ષા કરવી પડે. આઈવીએફ જેવી ટેક્નિકને કારણે સંતાનપ્રાપ્તિની શક્યતા વધી છે, પણ એમાં સફળતાનો દર ૩૦થી ૪૦ ટકા જેટલો જોવા મળે છે.

ભારતમાં સાક્ષરતાનું પ્રમાણ ઓછું હતું ત્યારે નિઃસંતાન દંપતીમાં હંમેશાં પત્નીનો વાંક કાઢવામાં આવતો. અભાગણી, વાંઝણી જેવાં મહેણાં-ટોણા સંભળાવી એને હડધૂત કરવામાં આવતી. શિક્ષણના પ્રસાર સાથે આવો હીન અભિગમ કૂણો થયો છે. હવે દંપતી વાસ્તવિકતા સ્વીકારી વૈજ્ઞાનિક પદ્ધતિથી સંતાનપ્રાપ્તિનો પ્રયત્ન કરે છે.