બીપી-ડાયાબિટીસ બની શકે પ્રેગ્નન્સી સમયની પળોજણ

નાની ઉંમરની છોકરીઓમાં વધુ જોવા મળતી પ્યુબર્ટી મેનોરેજિયા જેવી વ્યાધિને અવગણવા જેવી નથી.

- ડૉ. અર્ચના પારસ શાહ

સ્કૂલ-કૉલેજમાં થોડા દિવસમાં વેંકૈશન પડશે, પરંતુ સ્ત્રીઓને એમની વ્યાધિમાં વૅકેશન મળતું નથી. ચાલો, તમારી ગાયનેક ફ્રેન્ડ હાજર છે આવી કેટલીક વ્યાધિને લગતા સવાલના જવાબ સાથે...

પ્રશ્નઃ મારી પચ્ચીસ વર્ષની પુત્રીને પીસીઓડી છે. અગાઉ એની મેન્સ્ટ્રુઅલ સાઈકલ અનિયમિત હતી. એનો પિરિયડ રેગ્યુલર રાખવા અમારા ડૉક્ટરે દવા આપી છે, પણ એ દવા શરૂ કર્યા પછી બે સાઈકલ વચ્ચે પણ એને બ્લીડિંગ થાય છે. આ સ્થિતિમાં શું કરવું?

ગાયનેક ફ્રેન્ડઃ પીસીઓડી એટલે પોલિ-સિસ્ટિક ઓવરી ડિસીઝ. આ વ્યાધિમાં હોર્મોન્સ ઉપર-નીચે થતા હોવાથી (ઈબૅલેન્સ) પિરિયડ અનિયમિત થઈ શકે છે. સ્ત્રીના શરીરમાં એસ્ટ્રોજન અને પ્રોજેસ્ટેરોન નામના હોર્મોન્સ હોય છે, એનું સંતુલન ખોરવાય એનું પરિણામ પીસીઓડી. આ બે હોર્મોનની સપ્લિમેન્ટ માટે દવા લેવાથી માસિકસ્રાવ નિયમિત થાય છે, પરંતુ બે મેન્સ્ટ્રુઅલ સાઈકલ વચ્ચે બ્લીડિંગ થતું હોય તો શક્ય છે કે ગોળીનો ડોઝ બરાબર ન હોય અથવા તો દવા લેવાનું ચુકાઈ જતું હોય. તમારી પુત્રી એના ડૉક્ટરને મળીને દવા બદલાવી શકે છે.